​Hoti ripërsërit: Nuk do të ketë dialog teknik me Serbinë

Kryeministri Avdullah Hoti ka ripërsëritur sot se nuk do të ketë asnjëherë dialog teknik me Serbinë, derisa potencoi se Kosova ha hyrë në proces të bisedimeve vetëm për njohje reciproke.

Ai në interpelancën në seancën plenare të Kuvendit të Kosovës tha se marrëveshja përfundimtare Kosovë-Serbi do të jetë marrëveshje e parimeve për normalizim të marrëdhënieve në mes dy vendeve pas njohjes reciproke.

“Dua ta rikonfirmoj se nuk ka dhe nuk do të ketë dialog teknik siç pretendohet në kërkesën për interpelancë. Kosova ka hy në këtë proces vetëm për njohje reciproke dhe normalizim të marrëdhënieve ndërshtetërore. Për të gjitha temat që diskutohen në Bruksel vlen parimi se asgjë nuk dakordohemi derisa nuk dakordohemi për të gjitha çështjet. Pra, asgjë nuk nënshkruhet derisa të dakordohet marrëveshja e plotë përfundimtare ligjërisht e obligueshme që përfshin njohjen reciproke. Marrëveshja përfundimtare do të jetë marrëveshje e parimeve për normalizimin e marrëdhënieve në mes të dy vendeve pas njohjes reciproke. Kjo marrëveshje nuk do të ofrojë zgjidhje kreative të çështjeve të hapura mes të dy vendeve, por do të ofroj zgjidhje sistematike bazuar në konventat ndërkombëtare, marrëveshja nuk do të ofroj zgjidhje të përkohshme apo afatgjate, por zgjidhje të përhershme. Ndryshe nuk do të ketë marrëveshje”, tha Hoti.

Kreu i qeverisë tha se në raundet e deritanishme në nivel të koordinatorit për dialog ashtu edhe në nivel të lartë janë diskutuar tema e të pagjeturve dhe të zhvendosurve, raportet ekonomike, ndërkohë që ka filluar të trajtohet edhe çështja e obligimeve financiare.

Sa i përket çështjes së të pagjeturve, ai tha se e kanë shtruar si çështje të parë në procesin e dialogut.

“Kjo përbën një pikë të marrëveshjes së përgjithshme, këtë çështje e kemi shtruar të paren në procesin e dialogut. Këtu pritet të specifikohen veprimet konkrete që duhet ndërmarrë për ta përmbyllur këtë temë të dhimbshme për shumë familje kosovare dhe për të gjithë opinionin. Ju njoftoj që Kosova ka hyrë në këtë proces seriozisht dhe do ta ruajmë këtë seriozitet dhe angazhim në frymën konstruktive me insistimin eksplicit tek ndërmjetësi i dialogut për të përmbyllur marrëveshjen e përgjithshme vetëm me njohje reciproke, duke respektuar plotësisht rendin kushtetues të Kosovës, duke respektuar unitaritetin qeverisës dhe integritetin territorial. Kosova nuk ka marrë dhe nuk do të merr asnjë zotim siç theksohet në arsyetimin e interpelancës pa pranuar Serbia njohjen e Kosovës si shtet i pavarur… Palmer dhe Lajçak, të dy zyrtarë të SHBA dhe të BE-së më kanë konfirmuar mbështetjen për marrëveshjen përfundimtare dhe parimet e qarta të dialogut se dialogu duhet të përmbyllet me marrëveshje përfundimtare se asgjë nuk dakrodohet derisa të dakordohen të gjitha detajet e marrëveshjes”, tha ai.

Hoti ka folur para deputetëve edhe për temën e asociacionit të komunave me shumicë serbe, ku tha se kjo temë nuk hapet në dialog pasi ka një marrëveshje të vitit 2013.

“Me 7 shtator është zhvilluar takimi i dytë i nivelit të lartë, fillimisht në prani të Borrell për të vazhduar pastaj me Lajçak, në këtë takim është shtruar tema e obligimeve financiare dhe tema e asociacionit të komunave me shumicë serbe. Ne kemi prezantuar qëndrimet tona për këto tema. Lidhur me temën e obligimeve financiare siç ju kam informuar kemi shtruar çështjet, të cilat duhet të adresohen në këtë temë përfshirë këtu suksesionin, borxhin shtetëror, pensionet, shtesat e fëmijëve, dëmet e luftës dhe çështje të tjera. Ndërkaq lidhur me temën e asociacionit, qëndrimi jonë është se kjo temë nuk hapet në dialog pasi ka një marrëveshje të vitit 2013 që është ratifikuar në Kuvendin e Kosovës dhe përtej kësaj ekziston edhe marrëveshja e parimeve për asociacionin e vitit 2015 si dhe aktgjykimi i Gjykatës Kushtetuese”, tha ai. /Telegrafi/