Heynckes bën dallimin mes Ronaldos dhe Lewandowskit

Bayern Munich dhe Real Madrid do të takohen gjatë javës së ardhshme në kuadër të Ligës së Kampionëve.

Juup Heynckes, trajner i ekipit gjerman, ka folur për Sport Bild rreth takimit tejet të rëndësishëm kundër madrilenëve.

Gjëja e parë që bëri Heynckes ishte largimi i presionit, duke e përqendruar vëmendjen e ekipit bavarez në ndeshjen e ardhshme të Bundesligës, një titull që Bayerni tashmë e ka në xhep.

“Unë mendoj së pari për takimin me Hannoverin, pastaj të mërkurën duhet ta mbajmë ritmin si në ligë”, tha veterani.

Ai ka folur edhe për Cristiano Ronaldon dhe Robert Lewandowskin duke thënë se “Ata nuk mund të krahasohen, Robert gjithnjë luan me shpinën ndaj kundërshtarit, Ronaldo shpesh vjen nga ana e majtë dhe lëviz mes lojtarëve. Gjëja që e bën atë të jashtëzakonshëm është se plotëson edhe pozicionin e qendrës”.

Së fundi, Heynckes gjithashtu kishte fjalë të mëdha për trajnerin Arsene Wenger, i cili do të largohet në fund të sezonit pas 22 vjet drejtimi të Arsenalit.

“Ai ishte një nga trajnerët më të mirë në futbollin evropian dhe ka pasur një ndikim pozitiv në futbollin anglez përmes filozofisë së tij”, përfundoi Heynckes.

Theksojmë se takimi mes Bayernit dhe Real Madridit do të zhvillohet të mërkurën (25 prill) dhe pritet të startojë në orën 20:45. /Telegrafi/