Haradinaj: Ramë Lahaj ka lartësuar emrin e Kosovës në qendrat më të njohura kulturore në botë

Ramë Lahaj është një ndër tenorët më të famshëm shqiptar që prezanton vendin tonë në arenat ndërkombëtare.

Tenori gjatë ditës së sotme është pritur në zyrën e vetë nga kryeministri i Kosovës, Ramush Haradinaj.

Ky i fundit me këtë rast ka shprehur kënaqësinë që ka pasur rast ta takoj artistin, i cili ka lartësuar emrin e Kosovës në qendrat më të njohura të kulturës në botë.

“Tenori prestigjioz, Ramë Lahaj, përpos që ka arritur majat personale të suksesit, ka lartësuar emrin e Kosovës në qendrat më të njohura kulturore në botë”, ka shkruar në llogarinë personale në Facebook, Haradinaj. Ai me këtë rast i dhuroi Lahajt medaljen Gjergj Kastrioti – Skenderbeu.

” Kënaqësi e veçantë të flisnim për angazhimin e tij të madh, ruajtjen dhe avancimin e vlerave kulturore dhe të këmbenim mendime rreth ndërtimit të sallës koncertale, e cila do të jetë strehë ku artistët do t’i shpalosin veprat e tyre”, ka përfunduar i pari i qeverisë së Kosovës.

Theksojmë se Lahaj ka performuar me emra të njohur të njohur të skenave botërore duke përfshirë edhe tenorin e famshëm Placido Domingo. /Telegrafi/