Haradinaj ngushëllon familjen për vdekjen e Agim Llukës, i ndanë medalje post-mortem

Kryetari i Aleancës për Ardhmërinë e Kosovës, Ramush Haradinaj ka ngushëlluar familjen Lluka për vdekjen e familjarit të tyre, Agim Lluka.

Përmes një postimi në Facebook, Haradinaj tha se ka shprehur respektin oër intelektualin dhe atdhetarin Agim Lluka, duke ndarë edhe një medalje.

“Qëndrova në familjen e shquar pejane Lluka dhe ngushëllova kryefamiljarin Ekrem Lluka dhe të tjerët, me rastin e ndarjes nga jeta të vëllait të tij Agimit”, shkruan Haradinaj.

“Falënderova z. Ekrem Lluka për mbështetjen e tij gjatë Luftës Çlirimtare dhe periudhës së rindërtimit të vendit; si dhe shpreha respekt për intelektualin dhe atdhetarin Agim Lluka, duke ndarë medaljen postmortem “ME BESIM NË ZOT, ATDHE E SHTET” për kontribut të jashtëzakonshëm në çështjen kombëtare. Zoti ju forcoftë familje Lluka”, u shpreh ai.

Ndryshe, Agim Lluka ka ndërruar jetë sot pas një beteje me sëmundjen.

Ka lindur në Pejë në vitin 1961. Është vëllai i Presidentit të Korporatës Dukagjini, Ekrem Lluka.

Agim Lluka ishte që nga fillimi ndër drejtuesit më të spikatur të segmenteve të Korporatës Dukagjni, përfshirë edhe RTV Dukagjinin.

Lexo po ashtu Ndërron jetë Agim Lluka, njëri ndër drejtuesit e Korporatës Dukagjini

Roli i Agimit mbetet i madh në zhvillimin e jetës letrare, arsimore e kulturore edhe në sistem paralel, duke e vënë shtypshkronjën Dukagjini në dispozicion të rrethanave të kohës së okupimit në shërbim të institucioneve të Kosovës.

Pas luftës ishte ideator i themelimit të Radio Dukagjinit.

U shqua si mbështetës i librit me shtëpitë botuese, ombrellë e korporatës.

Ai do të mbetet në kujtesë për zellin, kontributin e madh dhe urtësinë e dëshmuar për dekada. /Telegrafi/