Haradinaj arsyeton propozimin e tij për katedralen e Notre Dame: Një gjest si shenjë falënderimi

Kryeministri i vendit Ramush Haradinaj arsyetoi propozimin e tij për mbështetje financiare për rindërtimin e Katedrales Notre Dame në Paris.

Haradinaj në një konferencë për media ka thënë se duhet bërë kujdes në deklarata mediatike, pasi mbështetja e financiare e Kosovës ndaj shtetit francez është modeste.

Ai po ashtu tha se Franca strehon e shëron qytetarë të Kosovës dhe siç tha ai gjesti që do të bëjë Kosova është më shumë si falënderim për ta.

Lexo po ashtu Shpend Ahmeti reagon ndaj propozimit për ndarje të mjeteve nga Qeveria e Kosovës për katedralen Notre Dame

“Duhet të bëjmë kujdes në deklarime të gjithë ne. Ky është gjest, nuk është renovim për Notre Dam. Shqiptarët shquhen për një qasje të tillë. Nuk e di sa, por një shumë simbolike. Nuk e kanë mirë ata që po mundohen me ua shëndoshë zemrat të varfërve e të sëmurëve. Në raste të caktuara edhe Franca na i shëron njerëzit. Sot në Francë strehohen dhjetëra – mijëra qytetarë të vendit tonë. I dëgjova disa deklarata të Lumirit dhe Shpendit. E kuptoj euforizmin, por nuk është ashtu. Ky është një gjest, që e bëjmë ne si popull si shenjë falënderimi”, ka thënë Haradinaj.

Ndryshe, kryetari i Komunës së Prishtinës, Shpend Ahmeti, ka reaguar ndaj propozimit të Qeverisë së Kosovës për ndarjen e mjeteve për katedralen Notre Dam. /Telegrafi/