Halitaj: EULEX-it i imponohet pushimi i përkohshëm

Gazetari dhe analisti politik Agron Halitaj, thotë se deri në ditën e tetë ekzistojnë mundësit reale që dikush prej deputetëve t’i drejtohet Gjykatës Kushtetuese, për interpretim të kushtetutshmërisë së Ligjit për ratifikimin e marrëveshjes për vazhdimin e mandatit të EULEX-it. Ndaj, Kuvendi nuk mund ta procedojë atë në Presidencë, për t’u shpallur nga kreu i shtetit. Postimin e tij të plotë, në profilin e tij në Facebook, mund ta lexoni të plotë më poshtë.

“EULEX-it i imponohet pushimi i përkohshëm

EULEX-i, zyrtarisht e ka përfunduar mandatin me të filluar së numëruari 24-orëshi i datës 15 qershor. Edhe sikur sot, Kuvendi i Kosovës të votojë pro vazhdimit të mandatit të tij edhe për dy vjet të tjera, prapëseprapë ky mision së paku edhe për një periudhë sado të shkurtër kohore duhet të pushojë së funksionuari. Kjo për faktin se tashmë janë konsumuar të gjitha afatet e parapara ligjore e kushtetuese për ta fituar mandatin e ri brenda kohës së rregullt.

Në Kushtetutë është e përcaktuar që dhjetë a më shumë deputetë të Kuvendit të Kosovës, brenda një afati prej tetë ditësh nga dita e miratimit, kanë të drejtë ta kontestojnë kushtetutshmërinë e çfarëdo ligji ose vendimi të miratuar nga Kuvendi, si për përmbajtjen, ashtu edhe për procedurën e ndjekur.

Kjo nënkupton që brenda kësaj kohe, Kuvendi nuk mund ta procedojë ligjin në Presidencë, për t’u shpallur nga kreu i shtetit. Deri në ditën e tetë ekzistojnë mundësit reale që dikush prej deputetëve t’i drejtohet Gjykatës Kushtetuese, për interpretim të kushtetutshmërisë së Ligjit për ratifikimin e marrëveshjes për vazhdimin e mandatit të EULEX-it.

Nëse kjo nuk ndodh, atëherë afati më i shkurtë i mbetjes së EULEX-it pa mandat mbetet 8-ditëshi, gjithnjë duke llogaritur se presidenti do ta nënshkruajë posa t’i ketë shkuar në tavolinë dhe pas këtij akti ligji do të publikohet me automatizëm në Gazetën Zyrtare.

Duke i pasur parasysh këto procedura, legjislaturat e mëparshme i kanë ratifikuar marrëveshjet me Brukselin, para qershorit. Psh. për mandatin që tash i ka skaduar EULEX-it, Kuvendi pati vendosur në muajin prill, përkatësisht dy muaj para përfundimit të mandatit që po ushtrohej”, ka shkruar Halitaj. /Telegrafi/