Haley ka refuzuar të jetë pjesë e administratës Trump

Katër ditë pas mesazhit të Donald Trumpit në rrjetet sociale, ku njoftoi se nuk do t’i kërkonte Nikki Haleyt që të kthehej në Shtëpinë e Bardhë, ajo tani thotë se kishte marrë një ofertë.

Haley – e cila ishte ambasadore amerikane në Kombet e Bashkuara gjatë presidencës së parë të Trumpit – thotë se e refuzoi ofertën për t’u emëruar në administratën e re amerikane, të cilën e kishte marrë nga miku i ngushtë i presidentit të zgjedhur, Steve Witkoff.

“Ai më tha ‘çfarë dëshiron? Më thuaj çfarë dëshiron. A ka diçka që dëshiron?’ Unë i thashë ‘Nuk kam asgjë që dua’,” tha ajo dhe shtoi se “nuk kisha interes të isha në kabinetin e tij. Ai e dinte këtë”, shkruan bbc.

Haley thotë se burri dhe djali i saj ishin “të shqetësuar” pasi presidenti i zgjedhur njoftoi në platformën “Truth Social” se nuk do t’i kërkonte asaj sërish të shërbente.

“Dhe e vërteta është, e di lojën që ai po luante. Nuk kam nevojë të luaj atë lojë. Por, më e rëndësishmja, duhet të shohim pamjen më të madhe. Është koha për të ecur përpara”, përfundoi republikania.

Kujtojmë se Haley ishte e fundit nga rivalët e mëdhenj të Trumpit që u largua nga gara për kandidaturën e partisë, në fillim të muajit mars.

Fillimisht e quajti të “çmendur” 78-vjeçarin, por më vonë e mbështeti Trumpin, duke thënë se ai “nuk ishte i përsosur”, por më “katastrofal” është Joe Biden.

Ndryshe, ish-guvernatorja republikane e Karolinës së Jugut është e martuar me Michael Haley, i cili ka rrënjë shqiptare. /Telegrafi/