Hadzic: Ja pse e zgjodha Sigal Prishtinën

Sigal Prishtina ka zyrtarizuar trajnerin e ri, Sabit Hadzic. Trajneri boshnjak për ‘Sport Plus’ është shprehur se Prishtina ka kryesi shumë të mirë dhe tifozë të mrekullueshëm. Ai thekson se mund të arrijnë suksese së bashku. Në Prishtinë është rikthyer edhe alo qendra, Aurimas Kieza.

Ashtu siç paralajmëruam një ditë më herët trajneri boshnjak, Sabit Hadzic do të emërohet kryetrajner i Sigal Prishtinës, kjo ndodhi gjatë ditës së premte. Klubi ‘Bardhekaltër’ me anë të një njoftimi bëri të ditur se është arritur marrëveshja 1-vjeçare.

“Ashtu edhe siç ju paralajmëruam ditë më parë, KB Sigal Prishtina nënshkruan kontratë me trajnerin e mirënjohur boshnjak i cili e udhëhoqi ekipin kombëtar të Bosnjës në ‘Eurobasket 2011’, Sabit Hadzic. Hadzic ishte po ashtu pjesë e gjeneratës së artë të ish-Jugosllavisë ku si organizator mori medalje olimpike në vitin 1984”, thuhej në njoftimin e KB Prishtinës në ‘Facebook’. Hadzic ka korrur suksese edhe me ekipin e Sarajevës duke u shpallur kampionë disa herë me këtë skuadër.

Hadzic: Tifozët e mrekullueshëm

Lajmin për arritjen e marrëveshjes e ka konfirmuar edhe trajneri boshnjak për ‘Sport Plus’. “Po, kemi arritur marrëveshje dhe javën e ardhshme do të vijë në Prishtinë. Ajo që më ka shtyrë të vijë në Prishtinë është organizimi i mirë i klubit, një kryesi shumë të mirë dhe tifozët. Mendoj se mund të bëjmë punë të mirë së bashku. Sa i përket përforcimeve është ende herët për të folur”, ka thënë Sabit Hadzic për gazetën tonë.

Arrin para 1 shtatorit

Menaxheri i skuadrës, Edis Kuraja ka theksuar se trajneri boshnjak pritet të arrijë deri më 1 shtator. “Kemi arritur marrëveshje 1-vjeçare me të dhe për shkak të disa procedurave që duhet t’i kompletojmë ai pritet të arrijë deri më 1 shtator për t’iu bashkuar skuadrës në stërvitje. Gjithashtu jemi në bisedime me disa basketbollistë të huaj dhe presim që të arrijmë marrëveshje. Njëri ndër ta është edhe Noah Dahlman i Balkanit”, deklaroi Kuraja për ‘Sport Plus’.

Kthehet Kieza

Prishtina të premten gjithashtu bëri të ditur se është rikthyer në radhët e saj, lituanezi, Aurimas Kieza. “Ju njoftojmë se KB Sigal Prishtina ka arritur që ta vazhdon bashkëpunimin me Aurimas Kiezan edhe për këtë sezon, duke lënë mundësinë e bashkëpunimit edhe për sezonin e ardhshëm, atë 2015/2016. Kieza do t’i bashkohet Prishtinës në fillim të muajit shtator dhe rikthimi i tij në parket planifikohet të bëhet në pjesën e dytë të muajit tetor. Vlen të ceket se rikthimi i Kiezas u kërkua me ngulm edhe nga tifozët tanë, ‘Plisat’”, ishte njoftimi i Prishtinës në ‘Facebook’. /Telegrafi/