Google: Kemi dashur që Nokia të kalojë në Android

Në fund të ditës së dytë të panairit Mobile World Congress në Barcelonë në skenën e madhe para publikut të gjerë ka dalë kryesuesi i Google Eric Schmidt. Nuk ka thënë asgjë revolucionare, por ka përmendur se Google me të gjitha forcat e veta ka tentuar t’ia mbushë mendjen Nokias të kalojë në sistemin e tyre operativ.

Interneti mobil është ardhmëria, kjo është përafërsisht përmbledhja e asaj që Schmidt ka thënë në Barcelonë. Ai ka ndarë disa të dhëna interesante për shërbimet e Google (Chrome ka 120 milionë përdorues aktiv, e në YouTube çdo minutë ngarkohen 35 orë video materiale), si dhe ka paraqitur një aplikacion interesant për përpunimin e videove në kompjuterët tablet me sistem operativ Android. Mirëpo, pos këtyre, nuk ka pasur ndonjë paralajmërim dramatik.

Schmidt ka thënë edhe shumë gjëra tjera për komponentin e kërkimeve.

“Sa ma shumë të dhëna ndani me ne, aq më mirë do të funksionojë kërkimi”, ka thënë Schmidt, duke mos harruar të përmend se këtë do ta bëjnë ekskluzivisht me pajtimin e përdoruesve.

Ai ka përmendur edhe konceptin e kërkimit autonom, me ç’rast celulari juaj do të mund të kërkonte informata të rëndësishme për mjedisin tuaj derisa ecni, mirëpo nuk ka përmendur shërbime të radhës nga Google të cilat do të mundësonin këtë gjë. Duke u përgjigjur në pyetjet e përdoruesve, Schmidt ka pranuar se Google ka tentuar t’ia mbushë mendjen Nokias që të kalojë në Android.

“Definitivisht kemi tentuar”, ka thënë ai, duke mos u lëshuar në komente për partneritetin e krijuar kohë më parë në mes të Nokias e Microsoftit. /Telegrafi/