Gjetjet e auditorit rreth kësteve të pagesave për lejeve ndërtimore nxit reagimin e shoqërisë civile në Ferizaj

Komuna e Ferizajt gjatë vitit 2023 ka lëshuar dhjetëra leje ndërtimore për objekte kolektive dhe leje të tjera individuale. Vite më parë ndërtuesit në këtë qytet kanë pasur mundësinë që pagesat për leje ndërtimore t’i bëjnë me këste. Por gjatë vitit të kaluar drejtoria për financa në këtë komunë nuk i ka prezantuar në raporte financiare këstet e pa paguara për leje ndërtimore. Kjo është konstatuar në raportin e auditorit të përgjithshëm për pasqyrat financiare vjetore të kësaj komune.

Kjo çështje ka nxitur reagimin e shoqërisë civile në këtë komunë .

Ndërkaq, sipas auditorit të përgjithshëm, komuna ka bërë prezantim jo i saktë të llogarive të arketueshme në PVF.

“Organizatat buxhetore mbajnë regjistra kontabël të saktë, të plotë, të azhurnuar dhe në harmoni me legjislacionin në fugi, për të gjitha informatat financiare dhe informatat tjera jo financiare. Komuna në shtatë raste, ka bërë prezantim jo të saktë të llogarive të arkëtueshme në PVF, në vlerë prej 127,976 euro, për gabimet e hasura si: Llogaritë e arkëtueshme për taksën për lejet ndërtimore janë të nënvlerësuara për 38,868 euro, pasi që komuna nuk ka shpalosur këstet e papaguara për lejet ndërtimore. Në anën tjetër, ka pasur një mbivlerësim në vlerë prej 87,625 euro, për cilat komuna nuk ka ofruar dëshmi për vlerën e prezantuar”, thuhet në raportin e auditorit të përgjithshëm.

Po ashtu, në një rast tjetër tek dhënia në shfrytëzim e pronës komunale, komuna kishte nënvlerësuar llogaritë arkëtueshme për 1 mijë e 483 euro.

“Komuna nuk ka një bazë të të dhënave ku mbahen shënimet e të gjitha llogarive të arkëtueshme, po ashtu nuk ka një komunikim të vazhdueshëm në mes drejtorisë së financave, Zyrtarit Kryesor Financiar dhe drejtorive që mbledhin të hyra, si dhe funksionimi jo efikas i kontrolleve të brendshme në përditësimin e regjistrave kontabël dhe ruajtjen e dokumentacionit”, thuhet më tej në raport.

Kenan Gashi, drejtor në organizatën joqeveritare “Avonet” që monitoron zhvillimet në këtë komunë ka thënë për Telegrafin se prezantimi i raporteve financiare apo llogarive të arkëtushmeme të komunës, sidomos para auditorit të përgjithshëm nënkupton për një keqmenaxhim të parasë publike.

“Avonet ka shqyrtuar dhe ka analizuar me kujdes raportin e fundit të Auditorit të Përgjithshëm lidhur me pasqyrat vjetore financiare të Komunës së Ferizajt dhe shprehim shqetësimet tona lidhur me keqmenaxhimin e parasë publike. Avonet i bën thirrje urgjente kryetarit të Komunës së Ferizajt që të reflektojë sa më shpejt mbi këto gjetje dhe të ndërmarrë veprime konkrete për të korrigjuar këto mangësi të rënda. Pra, është e domosdoshme që të merren masa për të siguruar menaxhimin e duhur dhe të përgjegjshëm të parasë publike”, ka thënë Gashi.

Edhe sipas auditorit të Përgjithshëm, kryetari i Komunës duhet te sigurojë se zyrtarët përgjegjës mbajnë evidenca të sakta për llogaritë e arkëtueshme dhe zyrtari Kryesorë Financiar duhet të sigurohet se prezantimi i tyre në PVF është i sakë dhe i plotë.

“Kryetari i Komunës është përgjegjës për përgatiten dhe prezantimin e drejtë të Pasqyrave Financiare sipas Standardeve Ndërkombëtare të Kontabilitetit në Sektorin Publik. Po ashtu, Kryetari i Komunës është përgjegjës edhe për vendosjen e kontrolleve të brendshme, të cilat i përcakton si të nevojshme për të mundësuar përgatitjen e Pasqyrave Financiare”, thuhet në raport.

Në anën tjetër kryetari i komunës së Ferizajt Agim Aliu, nuk ka qenë i qasshëm në telefon të hënën, por nëpërmjet një shkrese të cilën Aliu ia ka dërguar auditorit të përgjithshëm thuhet se, “Brenda 30 ditëve nga pranimi i Raportit final , do t’ju dorëzoj një plan të veprimit për zbatimin e rekomandimeve, i cili do të përfshijë afatet kohore dhe stafin përgjegjës për zbatimin e tyre”, thuhet në shkresën e Aliut të cilën e ka publikuar Auditori i Përgjithshëm në raportin Financiar. /Telegrafi/