Gjermania ofron përkrahje për proceset nëpër të cilat po kalon Kosova

Ministrja e Integrimit Evropian, Dhurata Hoxha, priti në takim Maria Flachsbarth, Sekretare e Shtetit në Ministrinë Federale për Bashkëpunim dhe Zhvillim Ekonomik, njëherësh anëtaren e Bundestagut gjerman, me të cilën diskutoi për liberalizimin e vizave si dhe procesin integrues.

Ministrja Hoxha theksoi se kushtet për liberalizimin e vizave sipas udhërrëfyesit të gjitha 95 janë përmbushur, tashmë ka filluar fushata për informimin e qytetarëve për lëvizjen e lirë, duke shpërndarë materiale edhe në gjuhët e komuniteteve në të gjitha lokalitetet e vendit.

Hoxha e falënderoi Flachsbarth, për kontributin e Gjermanisë në zgjidhjen e sfidave të Kosovës.

“Kosovës i duhet përkrahja për përshpejtimin e vendimmarrjes brenda këtij viti – sepse i kemi përmbushur të gjitha 95 kriteret. Vota e Gjermanisë në Këshillin e Ministrave është me rëndësi thelbësore për këtë proces”, theksoi Hoxha.

Sipas ministres, qytetaret e Kosovës nuk do ta keqpërdorin këtë të drejtë.

Siç thuhet në njoftim sekretarja e Shtetit, njëherësh edhe deputete e Bundestagut gjerman, Flachsbarth vlerësoi lart përkushtimin e Kosovës në përmbushjen e kushteve për liberalizim, duke vënë në pah rëndësinë e fuqizimit të sundimit të ligjit dhe Agjendën Evropiane të Reformave.

Ajo theksoi se Gjermania ka shprehur qëndrimin e vet për zgjerimin e BE-së drejt Ballkanit perëndimor, rëndësinë e paqes në këtë pjesë të Evropës si dhe zhvillimin ekonomik, duke ofruar përkrahje të gjithanshme për proceset aktuale nëpër të cilat po kalon Kosova. /Telegrafi/