Gjatë vitit 2019 janë kryer 1640 stentime në QKUK

Rifat Rama, 46 vjeç, me durim po kalon dhimbjet e një ndërhyrjeje të shpejtë në zemër, të domosdoshme për t’ia shpëtuar jetën.

Menjëherë pasi është pranuar në Qendrën Klinike Universitare të Kosovës, mjekët i kanë vendosur dy stenta që t’ia normalizojnë gjendjen zemrës së tij të rënduar.

“Po ndihem më mirë, më mirë jam, i falënderoj mjekët. Dhimbje kam shumë pak. Kisha dhimbje gjoksi me zihej fryma derisa ecja. Rrija në shpi i shtrirë, nuk mund të ecja. Tash, ta shohim, me emër të Allahut, ishalla nuk kam dhimbje ma. I falënderoj mjekët, mos mbetshim pa ta, po qaj se shumë më këqyrin mirë”, tha ai, raporton KP.

Sipas QKUK-së, nga 5 shkurti deri në dhjetor të vitit 2018, kardiologët kanë bërë 1640 stentime për 1376 pacientë dhe janë kryer mbi 2500 koronarografi.

Në vitin 2017, ndërkaq,  janë vendosur 768 stenta për 651 pacientë, gjersa janë realizuar 1114 koronarografi.

Vendimi për shërbim 24 orësh në Klinikën e Kradiologjisë Invazive dhe Kardiokirurgjisë, i marrë nga SHSKUK dhe Ministria e Shëndetësisë, hoqi listën e pritjes për stentim dhe u shpëtoi qytetarëve 12 milionë euro.

Derën hapur për një intervenim në zemër, pa pritur gjatë, e ka gjetur edhe Bajram Tahiri nga Vushtrria.

Ai është operuar të hënën, një orë pasi është pranuar në Klinikën e Kardiokirurgjisë.

Në vitin 2017 kishte vetëm 128 raste të intervenimeve të këtij lloji.

Këtë vit do të fillojë punën salla e re në Shërbimin e Kardiokirurgjisë me Kardiologji Invazive dhe Angiografi, i cili do ta largojë listën e pritjes për koronarografi. /Telegrafi/