Ndërsa konflikti në Gaza po shkakton dhimbje të madhe humanitare, me mbi 60 mijë viktima, përfshirë më shumë se 20 mijë fëmijë, qëndrimet e vendeve të fuqishme ndaj Izraelit dhe Palestinës po shkaktojnë debate të ashpra.
Kancelari gjerman, Friedrich Merz po qëndron në shtetin turk për një vizitë zyrtare, ku është takuar me presidentin e Turqisë, Recep Tayyip Erdogan.
Të dy liderët u paraqitën së bashku në një konferencë për shtyp dhe iu përgjigjen pyetjeve të gazetarëve.
Një gazetar e pyeti liderin gjerman se nëse mbështetja e Gjermanisë për Izraelin lidhej me të kaluarën naziste të vendit dhe nëse frikësohet që historia mund ta gjykojë përsëri për zgjedhjen e “anës së gabuar”.
Merz u përgjigj se “Gjermania ka qëndruar me Izraelin që nga themelimi i tij. Gjermania gjithmonë do të qëndrojë me Izraelin”.
Nga ana tjetër, presidenti turk, Erdogan kritikoi ashpër sulmet izraelite ndaj Gazës “ata po bombardojnë Gazën - kjo është gjenocid, një fushatë për të ndëshkuar njerëzit përmes vrasjes masive”. Lideri turk shtoi se Gjermania nuk po e sheh krizën dhe nuk po vepron për të ndalur tragjedinë.
Debati nxjerr në pah diferencat e thella diplomatike mes Gjermanisë dhe Turqisë, ndërsa konflikti në Lindjen e Mesme po sjell viktima të reja. /Telegrafi/
