I gatshëm ta mbyllë karrierën në klubin aktual

Për Ledjan Memushajn, përballja me Italinë do të jetë gjithmonë e paharrueshme në kujtesën e tij, aq sa ai nuk ngurron ta cilësojë edhe si ndeshjen më të bukur të karrierës së tij.

“Po, padyshim ishte një emocion i madh, ndoshta ishte ndeshja më e bukur në karrierë. Jo më e rëndësishmja por më e bukura se isha përballë një shteti ku jam rritur. Kundër Italisë ishte një emocion unik”, u shpreh Memushaj për mediat italiane.

Deri në fundin e kampionatit italian kanë mbetur pak javë dhe pastaj vjen koha për të vendosur se çfarë do të bëjë në të ardhmen. Por ndryshe nga menaxheri i tij, Mario Xhiufredi, i cili mendon se Memushaj meriton vetëm Serinë A, kapiteni është gati të zbresë edhe në B me klubin ku ai shprehet se ka kontratë derisa të dalë në pension.

“Ai është opinioni i tij, nuk ishin fjalë që i thashë unë. Është absurde të flasësh tani për merkaton, janë budallallëqe. Pastaj kam kontratë këtu deri kur të dal në pension, 2020 apo 2021. Pse ky besim i klubit? Ose punon mirë ai si menaxher ose jam i mirë unë”, tha 30-vjeçari duke qeshur,.

Ndërkohë, ai nuk kurseu elozhet për trajnerin Zdenek Zeman, duke e quajtur një privilegj faktin se punonte përkrah një personazhi të tillë.

“Padyshim Zeman punon ndryshe, si në nivel fizik ashtu edhe taktit. Me Zeman është më shumë lojë si të sulmosh hapësirat, ndërsa me Odon luanim më shumë me top në këmbë. Zeman është një prej shembujve të viteve të fundit. Nuk mund ta quaj një ëndërr që realizohet por një prej gjërave të rëndësishme të karrierës. Të punoj me të është një nder për mua”, deklaroi mesfushori i përfaqësueses shqiptare.