Gates i zhgënjyer me reagimin e SHBA-ve ndaj coronavirusit: Disa metoda janë përdorur me vonesë, por do të përdoren për pandeminë e ardhshme

Miliarderi amerikan Bill Gates, mendon që metodat për detektimin dhe luftën kundër coronavirusit janë aplikuar me vonesë, por mund të jenë të dobishme në pandeminë e ardhshme globale, shkruan Business Insider.

Themeluesi i kompanisë Microsoft, gjatë një paraqitje televizive në shoun e Carlos Watson, ka deklaruar se është i zhgënjyer si Shtetet e Bashkuara kanë reaguar ndaj coronavirusit, transmeton Telegrafi.

Megjithatë ka lavdëruar reagimin e Koresë së Jugut, Australisë, Zelandës së Re dhe disa vendeve tjera.

“Kam pritur që SHBA-të do të prijë me numrin e testimeve me qëllim që numri i të infektuarve mos të jetë shumë i madh. Gjithashtu kam pritur që Qendra për Parandalim dhe Kontroll të sëmundjeve infektive (CDC), të jetë zëri që shpjegon se bartja e maskave bën dallimin e madh”, ka shtuar Gates.

Ai ka vlerësuar se ka filluar me vonesë trajtimi me antitrupa i personave të infektuar me coronavirus me antitrupa.

“Të gjitha mjetet për luftimin e coronavirusit tani po përdoren. Do të dëshironim që t’i kishim aplikuar që nga fillimi. Madje do të shfaqet një metodë e re e testimit, por ajo do të jetë shumë e dobishme për pandeminë e mundshme të ardhshme”, ka thënë ndër tjera miliarderi amerikan.

Edhe pse pandemitë janë të paparashikuara, Gates mendon se herën tjetër reagimi duhet të jetë shumë më i mirë. Ai beson se në dhjetor të vitit të kaluar po të ishte ditur se çfarë po ndodh, coronavirusi nuk do të përhapej në pjesët tjera të botës. /Telegrafi/