Franca do të urdhërojë dyqanet me kondicioner ajri ‘të mbajnë dyert të mbyllura’

Qeveria franceze do të detyrojë të gjitha dyqanet me kondicioner ajri “të mbyllin dyert” dhe “të fikin reklamat me ndriçim gjatë natës”, në një përpjekje për të ulur përdorimin e energjisë.

Sipas mediave të huaja, përcjell Telegrafi, ministrja e Tranzicionit të Energjisë, Agnes Pannier-Runacher, thotë se është “absurde” që lënia e dyerve të hapura ndërkohë që ajri i kondicionuar është në punë mund të çojë në 20% më shumë konsum të energjisë.

Bizneset që thyejnë ndalimin, që do të hyjë në fuqi në ditët e ardhshme kur Pannier-Runacher të nxjerrë dekrete të reja, do të përballen me një gjobë prej 750 eurosh.

Disa qytete si Bourg-en-Bresse, Lyon, Besançon dhe Parisi kanë tashmë rregulla komunale në fuqi që nga mesi i korrikut, por tani qeveria dëshiron të zgjerojë iniciativën në të gjithë vendin.

Ndërsa një ndalim për reklamat me ndriçim midis orës 1 dhe 6 të mëngjesit zbatohet aktualisht në qytetet me më pak se 800,000 banorë, rregulloret e reja do ta bëjnë atë të zbatueshëm pavarësisht nga madhësia e popullsisë.

ANPCEN, një shoqatë franceze e cila bën fushatë kundër ndotjes nga dritat, tha se sfida vjen në zbatimin e rregulloreve – gjë që aktualisht nuk ndodh vazhdimisht.

Konventa e Qytetarëve për Klimën e presidentit Emmanuel Macron kishte propozuar kufizime edhe më ambicioze, duke përfshirë ndalimin e të gjitha ekraneve të reklamave video në hapësirat publike dhe në transportin publik, por këto ide përfundimisht u refuzuan. /Telegrafi/