Fjali që shkatërrojnë në heshtje një marrëdhënie

Çdo marrëdhënie kalon nëpër sfida, por ndonjëherë as nuk e kuptojmë se sa shumë fjalët që themi mund ta dëmtojnë besimin, afërsinë dhe dashurinë.

Ekspertët e marrëdhënieve pajtohen se nuk ka rëndësi vetëm ajo për të cilën flasim, por edhe mënyra se si flasim për të. Disa fjali, edhe nëse thuhen në nxehtësinë e momentit, mund të lënë plagë të thella.

Ja disa nga fjalitë më të zakonshme “toksike” që janë më dëmtuese për një marrëdhënie dhe sugjerime se çfarë të thuash në vend të tyre.

“Ti gjithmonë…” / “Ti kurrë…”

Përgjithësime të tilla e vënë partnerin tuaj në mbrojtje. Duke vepruar kështu, ne në thelb po e ndëshkojmë personin për një gabim, duke e reduktuar të gjithë kontributin e tij në marrëdhënie në një model të vetëm sjelljeje.

Në vend të kësaj thuaj: “Kur kjo ndodh, ndihem e lënduar/e harruar”. Përqendrohuni në situatën specifike dhe emocionet tuaja.

“Gjithçka është më e rëndësishme për ty se sa unë”

Kjo fjali shpreh dhimbje, por edhe një akuzë që mund të provokojë zemërim dhe mbrojtje. Në vend që ta ftojmë partnerin tonë të na kuptojë, ne e largojmë atë nga vetja.

Në vend të kësaj, thuaj: “Më mungon të kaloj kohë me ty dhe ndihem e vetmuar. A mund të organizojmë një mbrëmje vetëm për ne?”

“Nuk mund ta besoj që e the këtë!”

Shpesh e përdorim këtë fjali për të shprehur tronditje, por edhe për të turpëruar partnerin/en tonë. Kjo mund të çojë në tërheqje dhe pasiguri në komunikimin e mëtejshëm.

Në vend të kësaj, thuaj: “Kjo më habiti dhe më lëndoi. A mund të flasim për këtë kur të dy të jemi më të qetë?”

“Nëse nuk të pëlqen, e di ku është dera”

Kjo frazë përdor kërcënim dhe krijon pasiguri emocionale. Mund të tingëllojë sikur përfundimi i marrëdhënies është një opsion për çdo mosmarrëveshje, gjë që shkatërron ndjenjën e sigurisë.

Në vend të kësaj, thuaj: “Kjo temë është e vështirë dhe e rëndësishme për mua. A mund të përpiqemi të gjejmë një zgjidhje së bashku?”

“Je tepër i ndjeshëm”

Shmangia e emocioneve të partnerit tuaj mund të shkaktojë distancë dhe humbje të besimit. Çdo emocion është i vlefshëm, edhe nëse nuk e kuptojmë.

Në vend të kësaj, thuaj: “E shoh që kjo të ka prekur thellë. Më ndihmo të kuptoj më mirë se çfarë po ndjen”