E plotësuar (09:40): Kosova në raundin e parë të votimit nuk ka marrë 2/3 e votave të Asamblesë së Përgjithshme për t’u bërë pjesë e INTERPOL-it.
Në raundin e parë të votimit 76 shtete kanë votuar pro, 56 kundër dhe 22 kanë abstenuar.
Ndryshe, pas pauzës disa minutëshe të Asamblesë së Përgjithshme, pritet raundi i dytë i votimit për anëtarësimin e Kosovës në INTERPOL.
E plotësuar (09:05): Aktualisht shtete të ndryshme të pranishme në Asamblenë e INTERPOL-it po japin qëndrimet e tyre rreth anëtarësimit të Kosovës në INTERPOL.
Gjatë raportimit të delegacioneve para Asamblesë së Përgjithshme të INTERPOL-it deri tani pro Kosovës janë prezantuar ndër të tjera, Turqia, Arabia Saudite, Nigeria, Guajana, Pakistani etj, ndërsa me qëndrime kundër kanë dalë Maroku, Bjellorusia, Kina, Namibia etj.
E plotësuar (08:40): Shefi i Policisë së Kosovës, Rashit Qalaj ka përfunduar raportimin para Asamblesë së Përgjithshme së INTERPOL-it, rreth punës së Policisë së Kosovës.
Të pranishëm në Asamble gjatë raportimit të Qalajt ishin edhe një delegacion nga Policia e Kosovës.
Para Asamblesë së Përgjithshme ka mbajtur fjalim edhe Shqipëria.
E plotësuar: Aktualisht drejtori i Policisë së Kosovës, Rashit Qalaj është duke raportuar para Asamblesë së Përgjithshme të INTERPOL-it, rreth punës së Policisë së Kosovës.
Finalja për INTERPOL, Pacolli optimist se Kosova do të anëtarësohet
Asambleja e Përgjithshme e INTERPOL-it sot në rend dite ka votimin për anëtarësimin e Kosovës në këtë organizatë ndërkombëtare të bashkëpunimit policor, ndërsa ministri i Punëve të Jashtme të Kosovës, Behgjet Pacolli është shprehur optimistë se Kosova nga sot do të jetë anëtare e INTERPOL-it.
Kosova pret të marrë mbështetjen e dy të tretave të vendeve që po marrin pjesë në Asamblenë e Përgjithshme të INTERPOL-it.
Pacolli një ditë para votimit në Asamblenë e Përgjithshme të INTERPOL-it lidhur me anëtarësimin e Kosovës në këtë organizatë tha se Kosova ndodhet në një pozicion shumë të mirë dhe shpreson se nuk do të ketë surpriza negative.
Delegacioni i Kosovës, pak para votimit rreth anëtarësimit të Kosovës në INTERPOL
Ai theksoi se ka një vit që pothuajse tërë punën ia kenë dedikuar kësaj çështjeje.
"Besoj që Kosova do të jetë anëtare e INTERPOL-it", u shpreh Pacolli, duke shtuar se është shumë me rëndësi që Kosova të jetë anëtare e INTERPOL-it.
Sipas tij, deri sot gjithçka ka shkuar sipas planit, ndërsa tha se votimi në Asamble të INTERPOL-it është i fshehtë.
Pacolli tha se beson që Kosova që nga e marta në 11:00, sipas orës lokale do të jetë anëtare e INTERPOL-it.
