FC Prishtina, fituese e Kupës së Kosovës në futsall

FC Prishtina ka triumfuar në finalen e Kupës së Kosovës në futsall. Në ndeshjen e  zhvilluar, të mërkurën, në Pallatin e Rinisë dhe Sportit në kryeqytet, FC Prishtina e ka mundur FC Liqenin nga Drenasi, me rezultat 5-2.

Kjo finale dhuroi lojë shumë të fortë dhe cilësore, derisa u ndoq nga një numër i konsiderueshëm i tifozëve të të dyja klubeve.

Pjesa e parë ishte e hapur dhe me lojë dinamike nga të dyja ekipet. Si rrjedhojë u shënuan pesë gola.

Ndeshja nisi mirë për FC Prishtinën, e cila dominoi duke krijuar epërsi prej dy golash nëpërmjet Driton Nishorit (2’) dhe Jeton Rukovcit (10’).

Më pas Liqeni arriti ta ngushtojë epërsinë me golin e Dardan Topillës (11’). Prishtinasit shënuan sërish në minutën e 12-të, kur Jeton Rukovci realizoi golin e tij të dytë. Mirëpo, rezultatin e ngushtoi sërish Dardan Topilla, me golin e minutës së 15-të.

Në pjesën e dytë u zhvillua lojë shumë e fortë, ku përkundër presionit të vazhdueshëm Liqeni nuk arriti të gjejë hapësira në mbrojtjen e ngjeshur të prishtinasve për të barazuar rezultatin.

Në anën tjetër, Prishtina arriti që nëpërmjet kundërzbritjes të shënojë edhe dy gola tjerë nëpërmjet Fatlum Pishtanit, në minutën e 33-të dhe Melos Kelmendit në minutën e 39-të, duke e konfirmuar fitoren.

Në fund, trofeun kapitenit të FC Prishtinës, Jeton Rukovci, ia dorëzoi presidenti i FFK-së, Agim Ademi, derisa medaljet për FC Prishtinën dhe FC Liqenin i ndanë presidenti Ademi, drejtori i sportit në Komunën e Prishtinës, Granit Rugova dhe kryetari i Komisionit të futsallit, Haki Xhemajli.