Eurostat: Gjysma e qytetarëve të Shqipërisë janë në rrezik të varfërisë, më e larta në Evropë

Në vitin 2019, gati 51 për qind e shqiptarëve ishin në rrezik të varfërisë ose përjashtimit social, një përqindje që është më e larta në Evropë.

Të dhënat e prezantuara nga Zyra evropiane e Statistikave thonë se shteti i dytë në renditje është Mali i Zi me 36.6 për qind apo 14.4 pikë përqindje më pak se Shqipëria.

Maqedonia e Veriut renditjet e katërta me 34.2 për qind dhe Serbia me 31.1 për qind. Mungojnë të dhënat për Bosnjën e Hercegovinën dhe Kosovën.

Eurostat raporton se faktorët që ndikojnë varfërinë ose përjashtimin social ndikohen nga tregues të tillë si intensiteti në punë, niveli i edukimit, lloji i familjarit (sa fëmijë ka në varësi), kushtet e jetesës dhe migracionit.

Përqindja e shqiptarëve që ishin në rrezik varfërie ose përjashtimi social në 2019-në ishte më se dy herë më e lartë sesa mesatarja e Bashkimit Evropian (BE) prej 21.1 për qind. Këtë tregues, më të ulëtin në Evropë e kanë Sllovenia dhe Çekia, me përkatësisht 13.7 për qind dhe 12.1 për qind.

Sipas grupmoshave, në rrezik varfërie dhe përjashtimi social janë 53.9 për qind e fëmijëve nën 18-vjeç, sërish më e larta në Evropë. I dyti pas nesh është Mali i Zi me 43.9 për qind, ndërsa mesatarja e BE-së është 22.8 për qind.

Përqindja e varfërisë dhe përjashtimit social ulet lehtë për grupmoshën 18-64 vjeç në 49 për qind nga 21.1 për qind që është mesatarja e BE-së dhe 35 për qind e dyta pas Shqipërisë që është sërish Mali i Zi.

Për grupmoshat mbi 65 vjeç treguesi rritet sërish për Shqipërinë në 54 për qind nga 19.4 për qind që është mesatarja evropiane dhe 47 për qind e dyta është Bullgaria. /Monitor/