EULEX-it i përfundon mandati më 14 qershor, çfarë do të ndodh tutje?

Misioni i Bashkimit Evropian për Sundim të Ligjit në Kosovë (EULEX) ka filluar në vitin 2008 si misioni civil më i madh në kuadër të Politikës së Përbashkët të Bashkimit Evropian për Siguri dhe Mbrojtje.

Por, mandati i këtij misioni me ‘letra’ përfundon së shpejti.

Mandati aktual i EULEX-it është për ta mbuluar periudhën deri më 14 qershor 2023 duke u bazuar në Vendimin e Këshillit CFSP 2021/904.

Telegrafi ka kuptuar se janë duke u zhvilluar bisedime ndërmjet Kosovës dhe Bashkimit Evropian për të parë mundësitë e vazhdimit të misionit.

Siç ka kuptuar Telegrafi, javën tjetër në Kosovë pritet të jetë një zyrtar shumë i lartë i Bashkimit Evropian, i cili përfaqëson Zyrën e Sekretarit të Përgjithshëm për Sigurinë dhe Mbrojtjen e Përbashkët, Politikën dhe reagimin ndaj krizave në shërbimin evropian të veprimit të jashtëm.

Burimet e Telegrafit thonë se EULEX-it pritet t’i vazhdohet mandati, por kjo nuk është konfirmuar deri në këto momente as nga Bashkimi Evropian në Bruksel, e as nga institucionet e Kosovës.

Ndryshe, në kuadër të mandatit të tij, ky mision i BE-së zhvillon aktivitete të monitorimit dhe ka funksione ekzekutive të kufizuara.

EULEX-i vazhdon t’i mbështesë Dhomat e Specializuara dhe Zyrën e Prokurorit të Specializuar në përputhje me legjislacionin përkatës të Kosovës.

Misioni i përgjithshëm i EULEX-it është t’i mbështesë institucionet përkatëse të sundimit të ligjit në Kosovë në rrugën e tyre drejt rritjes së efektivitetit, qëndrueshmërisë, shumë-etnicitetit dhe llogaridhënies, të lira nga ndërhyrjet politike dhe në përputhje të plotë me standardet ndërkombëtare për të drejtat e njeriut dhe praktikat më të mira evropiane.

Momentalisht Shef i Misionit është Lars-Gunnar Wigemark, ish diplomat nga Suedia dhe ka mbi 400 persona si staf.

Lexo po ashtu Presidentja Osmani ia vazhdon mandatin EULEX-it në Kosovë edhe për një vit

EULEX-i mbështetet nga të gjitha 27 shtetet anëtare të Bashkimit Evropian dhe nga pesë shtete kontribuuese (Kanadaja, Norvegjia, Zvicra, Turqia dhe Shtetet e Bashkuara).

Presidentja e Kosovës, Vjosa Osmani, nëpërmjet një letre në muajin qershor 2021 drejtuar Përfaqësuesit të Lartë të BE-së për Politikë të Jashtme dhe Siguri, Josep Borrell Fontelles,  e kishte njoftuar atë për vazhdimin e mandatit të EULEX-it edhe për një vit./Telegrafi/