Ermal Fejzullahu sjell baladën “Kthema”: Shpresoj që publiku ta mirëpresë (Video)

Këngëtari i njohur Ermal Fejzullahu ka publikuar projektin e tij më të ri muzikor, këngën dhe klipin “Kthema”.

Kënga e re është e zhanrit baladë, teksa e sjell kësaj radhe më melankolik këngëtarin se herët e tjera.

Në një prononcim për Telegrafin, Fejzullahu ka folur rreth këngës së tij më të re, duke treguar se i k marrë disa javë kohë përgatitje.

“Kam përfunduar punën për projektin tim më të ri. Bëhet fjalë për një baladë e re, e cila titullohet “Kthema”, flet si gjithnjë për dashurinë. I përshtatet sezonit, dhe shpresoj se publiku do ta pëlqejë”, tha Ermal Fejzullahu për Telegrafin.

Në vazhdimin e bisedës, Ermali tregoi edhe për autorët e këngës, ndërsa zbuloi se kjo këngë është ripërpunim i një kënge shumë të vjetër, publikuar vite më parë.

“Muzikën dhe tekstin e këngës sime të re i ka bërë Valon Biba. Orkestrimi është kryer nga Virusi, ndërsa në tërësi, ‘Edhe njëherë’ është një projekt të cilin e sjell si ripërpunim, pasi kjo këngë është kënduar vite më parë nga miku im Hekuran Demaj, dhe tani vjen si një ripërpunim i ri, shumë i veçantë”, tregoi tutje Fejzullahu.

Klipi është punuar nga produksioni Imagine Films, ndërsa është publikuar në YouTube nga Onima. /Telegrafi/