Lëvizje e lirë edhe në Dubai, Emiratet e Bashkuara Arabe heqin vizat për Kosovën

Emiratet e Bashkuara Arabe kanë hequr vizat për Kosovën.

Lajmin e ka bërë të ditur presidentja e Kosovës, Vjosa Osmani, e cila ka falënderuar homologun e saj në këtë vend për pranimin e propozimit të saj.

“Presidentja e Republikës së Kosovës, Vjosa Osmani ka falënderuar Presidentin e Emirateve të Bashkuara Arabe, Mohamed Bin Zayed për pranimin e propozimit të saj për heqjen e vizave për qytetarët e Kosovës”, thuhet në njoftimin e Presidencës.

Tutje, thuhet se marrëveshja e arritur mes Osmanit dhe Bin Zayed muajin e kaluar tashmë është nënshkruar, duke hapur rrugë për më shumë mundësi bashkëpunimi midis dy vendeve.

“Falënderoj Presidentin e Emirateve të Bashkuara Arabe, Lartmadhërinë e Tij Mohamed Bin Zayed për pranimin e propozimit tim për heqjen e vizave për qytetarët e Kosovës. Marrëveshja e arritur gjatë takimit tonë muajin e kaluar tashmë është nënshkruar, duke hapur rrugë për më shumë mundësi bashkëpunimi midis vendeve tona dhe qytetarëve tanë”, ka shkruar Osmani.

Emiratet e Bashkuara Arabe është shtet federal i përbërë nga shtatë emirate.

Çdo emirat është i qeverisur nga një emir i trashëguar që së bashku formojnë Këshillin Suprem Federal, organi më i lartë legjislativ dhe ekzekutiv në vend.

Një nga emirët zgjidhet President i Emirateve të Bashkuara Arabe.

Emiratet janë Abu Dhabi, Ajman, Dubai, Fujairah, Ras al-Khaimah, Sharjah dhe Umm Al-Quwain. Telegrafi/