Elon Musk me një tjetër projekt ambicioz – paralajmëron “lidhjen e trurit me kompjuter”

Të martën në mbrëmje, Neuralink, një kompani në të cilën Elon Musk ka investuar 100 milionë dollarë ka bërë të ditur detajet e një projekti tepër ambicioz.

Sipas mediave të huaja, përcjell Telegrafi, bëhet fjalë për Neuralink, e cila ka në plan të fusë në tru një “robot”, me anë të së cilit do të bëhej një “lidhje e trurit me kompjuter”.

Kompania shpreson të fillojë të punojë me subjektet njerëzore sa më shpejt që të jetë e mundur, duke parashikuar që një gjë e tillë të fillojë në tremujorin e dytë të vitit të ardhshëm.

Kompania pretendon se sistemi do të jetë në gjendje të lexojë dhe të shkruajë sasi të mëdha informacioni.

Por, ashtu si shumë nga ndërmarrjet e tjera të zotit Musk, si anije kozmike ose tunele futuristike, kjo do të jetë një nga sfidat më të mëdha me të cilën mund të përballen shkencëtarët.

Musk, shefi ekzekutiv i prodhuesit të makinave elektrike Tesla, i cili ka pohuar se ai “dëshiron të vdesë në Mars”, ka një reputacion për të bërë gjëra të guximshme, si dhe për të bërë pretendime edhe më të guximshme që kalojnë besueshmërinë.

Në një konferencë të hënën, drejtuesit e Neuralink pranuan se kishin një “rrugë të gjatë për të bërë” para se të fillonin të ofrojnë një shërbim komercial. Por ata ishin të gatshëm të diskutonin publikisht punën e tyre. /Telegrafi/