Se pandemia e coronavirusit ka shkaktuar kaos të madh në botë, e dëshmojnë më së miri shifrat e të vdekurve dhe të infektuarve me COVID.

E një nga vendet më të prekura nga kjo pandemi padyshim se është Italia, e cila numëron mijëra të vdekur dhe të infektuar, transmeton Telegrafi.

Për ta parandaluar përhapjen e mëtejme të COVID-19, qeveria italiane një muaj më parë vendosi për masa të rrepta preventive, që nënkuptojnë qëndrimin nëpër shtëpi dhe kufizimin e lëvizjes së qytetarëve.

E tani që janë bërë një muaj nga ky vendim, rrugët e qytetit të Romës vazhdojnë të ngjajnë me skenat e filmave apokaliptik, ku as edhe një njeri nuk shihet në rrugë.

Duke filluar nga shëtitoret e deri të atraksionet e njohura turistike të Romës, përveç disa pëllumbave nuk shihet as edhe një njeri duke lëvizur, kjo për faktin se numri i të infektuarve dhe të vdekurve nga COVID-19 po vazhdon të jetë i lartë në Itali.