Dy senatorë italianë ndalohen të takojnë Veliajn në qeli

Dy nga senatorët e grupimit politik ‘Forza Italia’ Lorenzo Grassini dhe Roberto Berardi, por edhe politikanë të lartë në vendin fqinj, nuk janë lejuar ditën e sotme që të vizitojnë në paraburgimin e Durrësit kryebashkiakun e Tiranës, Erion Veliaj.

Përmes një mesazhi të përcjellë në rrjetet sociale, ata kanë shprehur mbështetjen për Veliajn dhe kanë ngritur shqetësimin se drejtësia në Shqipëri nuk duhet të kthehet si në epokën e errët të Tangentopoli-t në Itali.

Lorenzo Grassini është koordinator i Forza Italia për Ballkanin Perëndimor, ndërsa Roberto Berardi, senator i Legjislaturës 18, senator i Grosetos dhe komunitetit drejtues të Forza Italia.

“Jemi në Durrës, së bashku me deputetin Berardi, për t’iu gjendur pranë kryebashkiakut të Tiranës, për të parë kushtet e tij në burg. Në këtë moment ai gjendet i izoluar brenda kësaj ndërtese. Fatkeqësisht nuk na u lejua hyrja. Na rezervuan një pritje shumë të sjellshme, por urdhëri është për të mos lejuar të hyjë asnjë tjetër, përveç familjarëve. Fatkeqësisht, ashtu siç ka ndodhur edhe tek ne, në Itali, paraburgimi është kthyer në një problem, sepse shumë njerëz të politikës burgosen në mënyrë paraprake, për të arritur në disa zgjidhje që sot për sot, nuk na rezultojnë.

‘Forza Italia’ është gjithmonë në favor të garancisë. Pra, në favor të kujtdo që do të duhet të provojë, deri në gjykimin e madh final, pafajësinë e tij. Do të shohim si do të shkojë. Sigurisht, kjo rrjedhë që po merr sot është shumë e ngjashme me atë tonën, në periudhën e Tangentopoli. Shpresojmë që Shqipëria të mos kalojë një situatë të tillë të errët”, tha Lorenzo Grassini.

“Jemi kundër paraburgimit. Këtu duket sikur jemi kthyer në kohët e Tangentopoli-t, kur abuzohej me paraburgimin. Pa folur pastaj, për atë çka mund t’i shkaktojë personit, i cili më pas mund të rezultojë edhe i pafajshëm, e që mund të mos ketë kryer asnjë vepër. Këto janë plagë që ngelin gjatë, përgjatë gjithë jetës. Po, duhet bërë drejtësi, por drejtësi të drejtë. Ne jemi garantues, pra për një drejtësi të drejtë. Deri në një provë të kundërt, të gjithë jemi të pafajshëm”, u shpreh Roberto Berardi.

Çfarë është skandali Tangentopoli?

Gjatë skandalit Tangentopoli zbuloi një rrjet të gjerë ryshfetesh dhe financimesh të paligjshme midis bizneseve dhe partive politike, ku pati edhe kritika se disa arrestime ishin të nxituara dhe disa individë u dëmtuan padrejtësisht nga proceset gjyqësore.