Dy persona në gjendje kritike afër vendit ku ishte helmuar ish-spiuni rus dhe vajza e tij

Policia britanike ka njoftuar për një “incident të madh”, pasi dy persona i janë ekspozuar një substance të panjohur afër vendit ku ishte helmuar ish-spiuni rus, Sergei Skripal dhe vajza e tij, Yulia.

Policia ka thënë përmes një deklarate se një burrë dhe një grua në të 40-at, janë në gjendje kritike pasi janë gjetur në Amesbury, 13 kilometra larg nga vendi ku ishin helmuar Skripalët më 4 mars.

Policia ka izoluar zonën kur janë gjetur personat, pavarësisht se zyrtarët shëndetësorë kanë thënë se rasti nuk besohet se përbën rrezik më të gjerë.

Britania akuzon Rusinë për helmim të Skipalëve me agjent nervor Noviçok, derisa Moska kundërshton çdo keqbërje, shkruan Reuters, përcjell Telegrafi.

Lexo po ashtu Spiuni rus në Britani “helmohet në veturën e tij”

Noviçok është krijuar në kohën e Luftës së Ftohtë, në mes të Rusisë dhe Perëndimit, çka ka ndikuar në dëbimin e qindra diplomatëve nga të dyja palët.

Sergei dhe Yulia Skripal ishin gjetur pa ndjenja afër një stoli në Salisbury dhe kanë kaluar javë të tëra duke marrë trajtim shëndetësor.

Aktualisht ata janë liruar nga spitali, mirëpo mjekët ende nuk kanë dhënë detaje se si mund të ndikojë helmimi në shëndetin e tyre në të ardhmen. /Telegrafi/