Dy ministra e tre zv.ministra dhanë dorëheqje për arsye të ndryshme në qeverinë Kurti – çka dihet deri tash?

Kuvendi i Kosovës më 22 mars 2021 ka votuar qeverinë e re, të udhëhequr nga Albin Kurti, kryetar i Lëvizjes Vetëvendosje.

Qeveria Kurti 2 tashmë ka shumicën në Kuvend, por nga formimi i ekzekutivit për dy vjet e gjysmë qeverisje për arsye personale e profesionale dorëheqje kanë dhënë dy ministra e disa zëvendësministra.

Ministri i Shëndetësisë, Rifat Latifi kishte dhënë dorëheqje më 6 tetor 2022, thuajse një vit pas emërimit të tij në këtë pozitë.

Latifi ishte kritikuar për menaxhim jo të mirë të këtij sektori si dhe për udhëtime të shpeshta në SHBA, ku edhe kishte jetuar e punuar para se të emërohej ministër.

Dorëheqja tjetër në radhët e ministrave është kjo e fundit, e ministrit të Mbrojtjes, Armend Mehaj.

Mehaj dha dorëheqje nga kjo pozitë më 8 gusht 2023 për arsye familjare. Ani pse në publik janë përmendur edhe arsye tjera si ajo e mospajtimit me kabinetit qeveritar për relacionet më miqtë ndërkombëtare, largimi i Kosovës nga ushtrimet e Defender 2023, por që këto arsye nuk janë komentuar as nga Mehaj e as nga kabineti.

Kryeministri i vendit, Albin Kurti në mbledhjen e Qeverisë së Kosovës ka falënderuar ish ministrin e Mbrojtjes, Armend Mehaj për siç tha kontributin e pashoq gjatë punës së tij.

“E falënderoj edhe njëherë përzemërsisht për kontributin, angazhimin dhe dedikimin e të pashoq, ish-ministrin Armend Mehajn, ndërkaq bashkëshortes së tij i dëshiroj shërim të plotë  dhe të shpejtë”, tha Kurti.

E dorëheqje nga Qeveria Kurti kanë dhënë edhe disa zëvendësministra, Dukagjin Pupovci, Nita Shala e Edona Maloku-Bërdyna.

Dukagjin Pupovci ka dhënë dorëheqje nga pozita e zëvendësministrit të Arsimit më 24 nëntor 2022.

Ai në atë kohë kishte deklaruar se arsyet e largimit janë personale.

Dorëheqje nga pozita e zëvendësministre së Drejtësisë kishte dhënë edhe Nita Shala, më 1 nëntor 2022.

“Po, kam kërkuar dorëheqjen dhe nuk shërbej më në cilësinë e zëvendësministres së Drejtësisë”, ishte shprehur Shala.

Arsyeja e dorëheqjes, sipas saj është vendimi i Këshillit Drejtues të Universitetit të Prishtinës, i cili ndalon emërimin, riemërimin dhe avancimin e stafit akademik që shërben në detyra publike.

Së fundit nga pozita e zëvendësministres së Arsimit ka dhënë edhe Edona Maloku-Bërdyna. Ajo dha dorëheqje nga kjo pozitë më 1 gusht 2023.

Përmes një postimi të bërë në Facebook të martën, ajo ka njoftuar se dorëheqjen ia ka dorëzuar kryeministrit Albin Kurti, ndërsa ka thënë se për shkaqe subjektive e ka të pamundur të vazhdojë më tej angazhimin në këtë detyrë.

“Takimin përshëndetës me Kryeministrin e zhvilluam në frymë shumë pozitive siç ka qenë edhe bashkëpunimi me të dhe gjithë kolegët e qeverisë gjatë kësaj detyre. Kryeministrin Kurti e falënderoj përzemërsisht për besimin e dhënë, mbështetjen dhe afërsinë e treguar në këto dy vite shërbim”, ka shkruar Maloku-Bërdyna. /Telegrafi/