Durmishi përcjell testimin e Urës së Ibrit: Jemi në koordinim me KFOR-in

Zëvendës ministri i Infrastrukturës, Hysen Durmishi, i cili ka qëndruar në Mitrovicë ka thënë se sot përfundon procesi i testimit të stabilitetit infrastrukturor të urës mbi lumin Ibër.

Siç raporton gazetarja e Telegrafit, para mediave Durmishi tregoi se pas përmbylljes së këtij procesi, presin nga kompania e kontraktuar një raport nëse ura është  stabile për qarkullim të automjeteve.

“Sot gjatë ditës përmbyllet ky si proces dhe presim një raport prej kompanisë që të na tregojë se kjo urë a është stabile për qarkullimin e automjeteve. Besoj që sot përfundon testimi dhe brenda dy-tri ditëve presim raportin final”, ka thënë Durmishi.

Ai po ashtu foli edhe për raportin e kryeministrit të vendit, Albin Kurti me partnerët ndërkombëtarë në lidhje me këtë çështje.

Lexo po ashtu Nis testimi i stabilitetit infrastrukturor të Urës së Ibrit

“Kryeministri, qeveria kanë takime të rregullta me QUNT-in e të gjithë faktorët relevantë ndërkombëtarë. Siç e shihni kjo urë kur është ndërtuar, është ndërtuar për qarkullimin e automjeteve dhe të këmbësorëve. Duke e pa që sot secili qytetarë i Kosovës mund të lëviz lirshëm në Zveçan, Zubin Potok, Leposaviq, ashtu siç lëviz lirshëm në Shtërpcë, Graçanicë, Ranilluk dhe Kllokot atëherë është e pakuptimtë që kjo urë të mos hapet për kalimin edhe të automjeteve”, ka thënë Durmishi, raporton Telegrafi.

I pyetur se a kanë koordinim me KFOR-in, Durmishi pohoi një gjë të tillë.

“Po kemi koordinim me KFOR-in dhe me të gjithë, që t’i përfundojmë të gjitha procedurat”, ka thënë Durmishi.

Gjatë testimit të stabilitetit të urës së Ibrit është arrestuar Aleksandar Arsenijeviq nga partia Demokracia Serbe, pasi sipas zëvendësdrejtorit të Policisë së Kosovës për rajonin e veriut, Veton Elshani, ai  ka penguar punëtorët e komunës së Mitrovicës së Veriut dhe ka refuzuar urdhrat policore.

Ai është arrestuar në afërsi të urës kryesore mbi lumin Ibër, ku punëtorët e komunës ishin duke lyer.

Mësohet se anëtarë të partisë së Arsenijeviqit kanë penguar lyerjen e flamurit serb në afërsi të urës.

Ndryshe, ka përfunduar diskutimi publik për përfitimet që do të sjellë hapja e urës së Ibrit, ku të pranishëm ishin pos kryetarit të komunës, Erden Atiq janë edhe ministri i MAPL-së, Elbert Krasniqi dhe zëvendës drejtori i Policisë së Kosovës për rajonin e Mitrovicës së veriut, Veton Elshani.

Kryetari Atiq dhe ministri i MAPL-së, Krasniqi kanë vizituar urën e Ibrit dhe testimet që po kryhen aty. /Telegrafi/