Dorëheqje të papritura në Zvicër, largohen kreu i Forcave të Armatosura dhe shefi i inteligjencës

Kreu i forcave të armatosura të Zvicrës dhe shefi i shërbimeve të inteligjencës të vendit kanë dhënë dorëheqjen të dy nga detyrat e tyre.

Bëhet e ditur se Thomas Suessli dorëzoi dorëheqjen e tij si kreu i forcave të armatosura në fund të janarit, megjithëse ai do të qëndrojë në detyrë deri në fund të vitit 2025.

Christian Dussey, i cili drejton Shërbimin Federal të Inteligjencës, gjithashtu ka dhënë dorëheqjen, por do të qëndrojë në detyrë deri në fund të marsit 2026, shkruan Reuters, përcjell Telegrafi.

Largimet i konfirmoi edhe presidentja e komitetit të sigurisë së dhomës së ulët të parlamentit zviceran, Priska Seiler-Graf.

Ndryshe, largimet vijnë në një kohë të ndjeshme të mbrojtjes zvicerane, e cila është vënë nën kritika për vonesat në projektet kryesore pasi synon të rrisë kapacitetet e saj mbrojtëse pas agresionit rus në Ukrainë.

Në fillim të këtij viti Suessli tha se ishte i shqetësuar për vonesat e projekteve të ndryshme, duke përfshirë dronët ushtarakë nga Izraeli.

Departamenti i mbrojtjes po pret gjithashtu një drejtues të ri civil, pasi ministrja Viola Amherd dha dorëheqjen në janar, me pasardhësin e saj në kabinetin zviceran ende për t’u vendosur. /Telegrafi/