Dodik e “këshillon” Vuçiqin: Në rast të njohjes së Kosovës, të njihet edhe pavarësia e Republikës Serbe në Bosnjë

Të enjten, anëtari serb i Presidencës së Bosnjë dhe Hercegovinës, Milorad Dodik e këshilloi presidentin serb, Aleksandar Vuçiq që të përdorte Republikën Serbe (RS) si një “karrem” në bisedimet e Kosovës.

Pas takimit me Vuçiqin në Banja Luka, Dodik pohoi se fati i Republikës Serbe të lidhet me atë të Kosovës në bisedimet mes Beogradit dhe Prishtinës.

“Kjo do të nënkuptonte që në rast se Beogradi do ta njehte pavarësinë e Kosovës, të njëjtën gjë do të duhej ta fitonte edhe entiteti serb në Bosnje, i cili më pas do të bashkohej me Serbinë”, tha Dodik në një konferencë të përbashkët për shtyp, transmeton Telegrafi.

Kujtojmë se Dodik ka vite që pretendon se Republika Serbe është në të vërtetë shtet i pavarur, dhe këtë e përsëriti gjatë ditës së sotme, duke sugjeruar që autoritetet në Banja Luka kanë të drejtë të vendosin në mënyrë të pavarur se çfarë politike të jashtme do të ndjekin.

Në të njëjtën kohë, interesat e Serbisë gjithmonë do të jenë në radhë të parë, theksoi ai.

Vuçiq tha se “duhet të mendojë” për propozimin e Dodik, por theksoi se Marrëveshja e Dejtonit është “e padiskutueshme” për Serbinë, shkruan index.hr.

Beogradi dhe Prishtina rifilluan dialogun në Bruksel javën e kaluar pas ngërçit për një vit e gjysmë.

Bisedimet u pezulluan në fund të vitit 2018, kur autoritetet e Kosovës vendosën 100 për qind taksë doganore për mallrat me origjinë nga Serbia në shenjë hakmarrjeje për veprimet diplomatike të Beogradit për lobim kundër njohjes së pavarësisë së Kosovës dhe për të parandaluar pranimin në organizatat ndërkombëtare. /Telegrafi/