Detaje të bisedimeve të planifikuara në Arabinë Saudite për arritjen e paqes në Ukrainë

Arabia Saudite dëshiron të presë bisedimet e paqes midis Ukrainës dhe Rusisë në fillim të muajit gusht.

Data e saktë e negociatave nuk dihet ende, por The Wall Street Journal raportoi se takimi në Jeddah duhet të zhvillohet më 5 ose 6 gusht, pra gjatë kësaj fundjave. Bisedimet do të zhvillohen pa praninë e Rusisë.

Në takim duhet të marrin pjesë zyrtarë të rangut të lartë nga rreth 30 vende.

Këshilltari i kreut të Ministrisë së Punëve të Jashtme të Ukrainës, Yevgeny Mikitenko, tha se në këto bisedime do të marrin pjesë përfaqësues të niveleve të ndryshme, në varësi të vendit.

Lexo po ashtu Ukraina tregon katër kushtet e paqes me Rusinë

Përfaqësuesi zyrtar i presidentit të Afrikës së Jugut, Vincent Magwenya, konfirmoi pjesëmarrjen e Republikës së Afrikës së Jugut. Ai theksoi se nuk është një delegacion i Afrikës së Jugut, por një përfaqësues.

Gjithashtu, sipas fjalëve të tij, në takim do të vijnë edhe përfaqësues të vendeve të G7-s, Bashkimit Evropian, Indisë, Brazilit dhe Turqisë.

Më herët edhe Republika Çeke konfirmoi pjesëmarrjen në negociata ndërsa qeveria braziliane njoftoi se do të dërgonte përfaqësuesin e saj.

Ministria e Jashtme e Ukrainës shprehu shpresën se Pekini do të konfirmojë zyrtarisht pjesëmarrjen në ditët në vijim. Megjithatë, sipas informacioneve, Kina nuk pranoi të merrte pjesë.

Zëdhënësi i Kremlinit, Dimitriy Peskov tha se Rusia do të monitorojë takimin e paqes në Arabinë Saudite për Ukrainën dhe vuri në dukje se aktualisht nuk ka parakushte për një zgjidhje paqësore të konfliktit në Ukrainë. /Telegrafi/