Detaje nga plagosja në Gjonaj të Prizrenit – arrestohet i dyshuari, policia i gjeti 37 fishekë

Një plagosje me armë zjarri ka ndodhur mbrëmë në Gjonaj të Prizrenit, ku nga përdorimi i armës mbetën të plagosur dy persona.

Policia përmes raportit 24 orësh ka dhënë detaje sesi ka ndodhur rasti.

“Viktima mashkull kosovar, ka raportuar se derisa ishte së bashku me dy viktimat meshkuj kosovarë, pas një mosmarrëveshje janë sulmuar me mjete të forta si dhe me armë zjarri, nga tetë të dyshuar meshkuj kosovarë. Dy nga viktimat kanë pranuar tretman mjekësor dhe më pas njëri nga ta është liruar, ndërsa tjetri është transferuar për trajtim të mëtutjeshëm”, ka njoftuar policia.

Lexo po ashtu Plagosje dhe rrahje në Prizren - policia jep detaje

Tutje bëhet e ditur se në vendin e ngjarjes në dy lokacione janë gjetur dhe konfiskuar tre gëzhoja.

“Me vendim të prokurorit është  bërë bastisja në dy lokacione, ku gjatë kontrollit është hasur dhe arrestuar njëri nga të dyshuarit meshkuj kosovarë, po ashtu është hasur dhe një kamionetë që dyshohet se është përdorur në kryerjen e veprës ku brenda saj janë gjetur dhe konfiskuar 37 fishekë që dyshohet të jenë të armës me gaz”, njofton policia.

Pas intervistimit me vendim të prokurorit i dyshuari është dërguar në mbajtje. /Telegrafi/