Deputetët zviceranë refuzojnë lejimin e transferimit të armëve në Ukrainë

Dhoma e ulët e parlamentit të Zvicrës të enjten votoi kundër një propozimi që do të kishte autorizuar në mënyrë specifike transferimin e armëve të prodhimit zviceran në Ukrainë.

Votimi në parlament erdhi pasi presidenti zviceran Alain Berset u takua me presidentin ukrainas Volodymyr Zelensky në samitin e Komunitetit Politik Evropian në Moldavi, ku dyshja diskutuan çështjen e eksporteve të materialit luftarak.

Dhe siç raportojnë mediat e huaja, përcjell Telegrafi, Këshilli Kombëtar në Bernë votoi 98-75 kundër një nisme parlamentare të paraqitur nga një komision.

Jean-Luc Addor, i Partisë Popullore Zviceriane, populiste, të krahut të djathtë — më e madhja në Këshillin Kombëtar — tha në Këshill se “të pranosh këtë nismë do të thotë të përkushtohesh ndaj një prej protagonistëve, që është gjithashtu në vetë titullin e saj ( “Lex Ukraine”). Prandaj duke shkelur neutralitetin”.

Pozicioni afatgjatë i Zvicrës ka qenë ai i neutralitetit ushtarak të armatosur mirë dhe vendi pa dalje në det me 8.8 milionë banorë ka rekrutim të detyrueshëm për burrat.

Çështja e traditës së neutralitetit të Zvicrës është debatuar ashpër që nga agresioni i plotë i Ukrainës nga Rusia në shkurt të vitit 2022.

Ndërsa vendi i pasur alpin, i cili nuk është anëtar i Bashkimit Evropian, ka ndjekur shembullin e bllokut ndaj sanksioneve që synojnë Moskën, ai deri më tani ka treguar më pak fleksibilitet në neutralitetin e tij ushtarak.

Kështu, me gjithë presionin nga Kievi dhe aleatët e saj, Zvicra deri më tani ka refuzuar të lejojë vendet që mbajnë armë të prodhimit zviceran t’i eksportojnë ato në Ukrainë. /Telegrafi/