Deputetët e partisë së kryeministres britanike po kërkojnë dorëheqjen e Liz Truss

Liz Truss po përballet me një reagim të ashpër nga deputetët konservatorë pasi shkarkoi kancelarin dhe njoftoi një kthesë të dytë në një politikë të madhe ekonomike.

Një ish-ministër i tha BBC-së, “ne nuk mund të vazhdojmë kështu pafundësisht”, raporton skynews.

Një tjetër deputet konservator tha se partia ishte në një “gjendje dëshpërimi” pas konferencës për shtyp të kryeministres në Downing Street.

Mbështetësi i Truss, Christopher Chope tha se “koha do të tregojë” nëse ajo kishte bërë mjaft për të siguruar pozicionin e saj, duke i quajtur ata që komplotonin për t’i hequr “hienat”.

“Ne nuk mund të detyrojmë një kryeministër tjetër të largohet nga detyra, ne thjesht duhet të qetësohemi dhe të përpiqemi t’i japim kryeministres mbështetjen tonë”, tha Sir Christopher.

Në një përpjekje për t’i dhënë fund trazirave në tregjet financiare, Truss shkarkoi kancelarin dhe aleatin e saj të ngushtë, Kwasi Kwarteng, duke e zëvendësuar atë me ish-sekretarin e jashtëm, Jeremy Hunt.

Ajo më pas ndryshoi një politikë kyçe për të hequr një rritje të planifikuar të taksës së korporatës nga 19 për qind në 25 për qind.

Kjo është kthesa e dytë e madhe në mini-buxhetin e shtatorit, pasi Truss anuloi planin e saj për të hequr normën më të lartë të tatimit mbi të ardhurat në fillim të këtij muaji.

Në një konferencë të shkurtër shtypi në Downing Street të premten, kryeministrja hodhi poshtë thirrjet për dorëheqje, duke thënë se ajo ishte e vendosur të përmbushte premtimet e saj.

Por, mini-buxheti tronditi tregjet financiare dhe shkaktoi një revoltë mes deputetëve konservatorë, të cilët i kërkuan kryeministres të hiqte dorë prej planit të saj ekonomik për të mbështetur financat e britanikëve.

Shumë në partinë parlamentare Konservatore mendojnë se duhet të shmangin një tjetër garë lidershipi të zgjatur ku fjalën e fundit e kanë anëtarët konservatorë. /Telegrafi/