Deportimi i shtetasve turq, Berisha: Nuk kemi qenë të informuar për natyrën e fluturimit

Ish-drejtori i Departamentit të Aviacionit Civil, Ismail Berisha, dhe drejtori i Agjencisë së Shërbimeve të Navigacionit Ajror, Bahri Nuredini kanë raportuar para Komisionit Hetimor Parlamentar në lidhje me ndriçimin e rastit të dëbimit të gjashtë shtetasve turq.

Berisha me këtë rast tha se Aviacioni civil nuk ka qenë i informuar për deportimin e shtetasve turq më 29 mars të këtij viti dhe po ashtu nuk ka qenë i njoftuar as për natyrën e fluturimit.

“Jo, për natyrën e fluturimit jo. Pasi që unë e thashë, kam kërkuar të dimë për natyrën e fluturimit, çka ka ndodhur, sepse në kërkesën që është bërë, ishte operim ajror rajonal, biznesor, një pasagjer vajtje-ardhje edhe asgjë më shumë. Kjo ka qenë e gjitha”, ka thënë Berisha.

Ai tha të jetë kontaktuar nga Policia e Kosovës vetëm pasi ka ndodhur rasti, e më vonë edhe nga dy zyrtarë të AKI-së. Sipas tij, policia i ka kërkuar informata për rastin në fjalë, ndërsa zyrtarët e AKI-së kanë kërkuar të japin informacione nëse kanë dyshime për ndonjë rast të ngjashëm.

Për rastin e deportimit të gjashtë shtetasve turq, Berisha tha se ishte informuar vetëm nga mediat.

“Për rastin që ka ndodhur, të njëjtën ditë e kemi marrë vesh. Të njëjtën ditë, sepse u bë publike, transparente nga mediat, gjitha ato, edhe menjëherë jemi takuar në kabinetin e ministrit, e kemi diskutuar rastin, kemi bërë planin e veprimeve, se çfarë veprime do të ndërmarrim dhe në bazë të asaj kemi vepruar deri në fund ku neve na pamundësohet të veprojmë më tutje”, ka thënë Berisha.

Lidhur me kërkesën që kanë marrë nga kompania e fluturimeve që barti gylenistët drejt Turqisë, Berisha tha se ka qenë kërkesë për taksi, një pasagjer vajtje-ardhje, dhe si të tillë edhe e kanë miratuar. Sipas tij, nga ana e operatorit të fluturimeve ka pasur shkelje lidhur me lejen që Aviacioni Civil ua ka dhënë.

Ndërsa Bahri Nuredini nga Agjencioni i Shërbimeve të Navigacionit Ajror tha se nga institucioni që ai udhëheq nuk ka pasur shkelje, ndërsa operatori i fluturimit ka hyrë në Kosovë me leje dhe nga aspekti i sigurisë nuk ka pasur ndonjë cenim.

“Agjencioni i Shërbimeve të Navigacionit Ajror ofron shërbime të trafikut ajror. Në këtë rast ministria e Infrastrukturës është përgjegjëse për dhënien e lejeve ndërsa aeroporti dërgon në baza ditore 24 orë më herët planin e fluturimeve dhe për neve, ne kemi filluar hetimin vetëm e vetëm, sepse ka pasur kërkesë, sepse nga aspekti i sigurisë ka qenë çdo gjë në rregull, fluturim vajtje-ardhje dhe i cili realisht i është nënshtruar komplet rregullativës së shërbimeve së kontrollit të trafikut ajror. Ne e gjykojmë se nuk ka pasur shkelje”, ka thënë Nuredini.

Gjatë ditës së sotme, ky komision ka intervistuar edhe ministrin e Infrastrukturës, Pal Lekajn, ndërsa intervistimi i inspektorit të Përgjithshëm të Agjencisë së Kosovës për Inteligjencë, Shkelzen Sopjani është bërë pa praninë e mediave. /KP/