Deponitë e mbeturinave përplasin pozitën e opozitën në Kuvendin e Lipjanit

Komuna e Lipjanit gjatë viteve të fundit po përballet me deponi pa leje të mbeturinave të cilat po krijohen në zona urbane të qytetit dhe në lokalitete të ndryshme.

Kjo çështje ka nxitur reagimin e opozitës, Lëvizjes Vetëvendosje dhe PDK-së, në mbledhjen e së enjtes në Kuvendin e Lipjanit.

Sipas kuvendarëve lidhur me deponitë e mbeturinave edhe organizatat e ndryshme e kanë nxjerrë Lipjanin si Komunën me numrin më të madh të deponive të mbeturinave.

Alban Salihu, shef i grupit të kuvendarëve nga radhët e Lëvizjes Vetëvendosje, ka thënë se në fillim të këtij muaji, instituti “ATLAS” e kishte trajtuar problematikën e deponimeve e deponimeve ilegale në Kosovë, ndërkaq nga aty ishte kuptuar se Komuna e Lipjanit, sipas Agjencisë për Mbrojtjen e Mjedisit të Kosovës, është komuna me numrin më të madh të deponimeve ilegale të mbeturinave.

“Ky fakt, sado që na indinjon, megjithatë nuk na befason. Me dhjetëra herë unë e shumë kolegë asamblistë kemi reaguar e kemi ngritur shqetësime për këtë fenomen. Shumë qytetarë nga shumë vendbanime kanë reaguar në forma të ndryshme, porsi shumë shqetësime të tjera drejtuar edhe drejtuesve të komunës, edhe ky shqetësim ka hasur në vesh të shurdhër. Pas dymbëdhjetë viteve qeverisje me rangu komunën në vendin e parë, në nivel vendi për nga numri i deponimeve ilegale të mbeturinave, besoj që është për t’u turpëruar”, ka kritikuar Salihu.

Po ashtu edhe Ardit Cani, kuvendar nga radhët e PDK-së ka kritikuar ekzekutivin se nuk po marrinmasa për t’i larguar disa deponi të mbeturinave nëpër lokalitete, madje një e tillë ishte krijuar edhe në lokalitetin e tij në Baicë.

“Kërkojmë nga organet kompetente të dalin në terren dhe ta shikojnë gjendjen dhe të merren masa urgjente për pastrimin e tyre”, ka thënë midis të tjerash Cani.

Në anën tjetër Kryetari i Komunës së Lipjanit Imri Ahmeti, ka thënë se është e natyrshme se ka organizata të ndryshme lokale dhe të tjera, që monitorojnë dhe nxjerrin përfundimet e konstatime tilla, por për ta gjykuar dhe vlerësuar drejtë situatën me mbeturina duhet të merren edhe indikator të tjerë.

“Sido që të jetë, unë vlerësoj që ka nevojë të bëhet shumë më shumë dhe ka nevojë për ndërhyrje. Në disa raste të deponimeve, e dini që i kemi ndërhy edhe vitin e kaluar dhe po përgatitemi të ndërhyjmë edhe në këtë vit, por keni parasysh, përpjekjet tona kanë qenë që të pastrohet çdo shtrat i lumit që secilës familje t’ua mundësojmë një shportë mbeturine dhe e kemi bërë. Natyrisht është subvencionu edhe pjesa ose kategoria sociale e qytetarëve për të mos pagu ata direkt shpenzimet që kanë të bëjnë me kontratën që kanë me pastrimin, andaj komuna ka marrë këtë obligim dhe e kemi mbështetë”, ka thënë Ahmeti.

Ai ka shtuar se duhet të organizohet edhe një fushatë e përbashkët vetëdijësuese dhe lotuese për ta ruajtur të gjithë ambientin./Telegrafi/