Federata e Futbollit e Kosovës (FFK) ka caktuar gjyqtarët për ndeshjet e vlefshme të javës së 15-të në Superligën e Kosovës.
Këtë vikend dhe në ditën e hënë do të zhvillohet java e 15-të në elitën e futbollit kosovar, ku nuk mungojnë ndeshjet interesante.
Ndeshja më interesante do të jetë ajo e derbit të Anamoravës në mes të Gjilanit dhe Dritës, ndërsa komisioni i gjyqtarëve tashmë ka bërë përzgjedhjen.
Ky derbi i zjarrtë lokal i është besuar gjyqtarit të mirënjohur Dardan Çaka, i cili do të jetë i shoqëruar nga asistentët Elvis Bicaj dhe Imran Kabashi.
Gjyqtar i katër i kësaj ndeshje do të jetë debutuesi Valbon Hoxha, ndërsa interesantja e kësaj jave është se do të ketë shumë gjyqtarë tjerë debutues.
Mentor Ajeti dhe Lirim Jashari do të drejtojnë sfida për herë të parë në një ndeshje të Superligës, me të parin që do ta drejtojë duelin Ballkani-Arbëria, ndërsa i dyti përballjen Drenica-Llapi.
‘Sefte’ do t’ia bëj edhe Vigan Ibërdemaj si gjyqtar kryesor, pasi ai është deleguar ta ndajë drejtësinë në duelin ndërmjet Feronikelit dhe Trepçës ’89.
Ndeshja në mes të Besës dhe Prishtinës i është besuar Shpëtim Murtezit, ndërsa asistentë të tij do të jenë Safet Berisha dhe Hekuran Osmani. /Telegrafi/
