De Boer: Barca më shumë ekip se sa Reali, e fiton El Clasicon

Ish-mesfushori holandez i Barcelonës, tash trajneri i njohur, Frank De Boer, beson se Barcelona do ta fitojë El Clasicon të dielën.

Holandezi fitoi titullin me Barcelonën në sezonin 1998-1999 dhe beson se identiteti ekipor i ish ekipit të tij mund ta ndihmojë klubin që ta fitojë betejën vendimtare për titull.

Barcelona ka tri pikë më pak se Reali që ka një ndeshje më pak të zhvilluar, por me një fitore në Clasico katalanasit do të jenë në vendin e parë falë statistikës së mirë kokë më kokë.

“Top lojtarët e botës luajnë në Spanjë. Klubet spanjolle në vitet e fundit kanë dominuar Ligën e Kampionëve, sidomos Messi dhe Ronaldo, që janë lojtarët më të mirë të botës”.

Lexo po ashtu Krejt lajmet rreth El Clasicos

“Është për atë se kush është më në formë. Tani për tani është e barabartë. Real Madridi është stabil këtë vit në secilin pozicion. Ata mund të shënojnë me Ronaldon, Ramosin, Moratan dhe Balen. Ata kanë shumë yje dhe mund të luajnë me të gjithë lojtarët në dispozicion”.

“Barcelona në sytë e mi është më shumë ekipore. Ata kanë ide për atë që luajnë. Neymar ka ngritur formën, Messi është i mprehtë me Suarezin. Mendoj se të dy janë në formë dhe është vështirë të caktohet se kush fiton, por unë besoj se Barca do të dalë triumfuese”, u shpreh De Boer.

El Clasico zhvillohet të dielën nga ora 20:45. /Telegrafi/