LAJMI I FUNDIT:

Comey: FBI po heton mundësinë e përzierjes ruse në zgjedhje

Comey: FBI po heton mundësinë e përzierjes ruse në zgjedhje

Drejtori i FBI-së, James Comey, të hënën konfirmoi se agjencia po heton mundësinë e përpjekjes së qeverisë ruse që të ndikojë në zgjedhjet e vitit 2016, duke përfshirë edhe lidhjen e mundshme të kampanjës së presidentit Donald Trump me Moskën.

Comey në dëshminë para Kongresit tha se hetimet përfshijnë edhe verifikimin e lidhjeve ndërmjet individëve të afërt me kampanjën e Trump dhe qeverisë ruse, dhe nëse ka pasur koordinime ndërmjet kampanjës në aktivitetet ruse.


“Duke pasur parasysh se bëhet fjalë për hetime sekrete, të cilat janë në rrjedhë, nuk mund të them më shumë për atë se çfarë po bëjmë dhe cilën çështje jemi duke hetuar”, tha ai.

Comey tha se as Ministria e Drejtësisë dhe as agjencia që ai drejton nuk kanë fakte për të konfirmuar pohimet e Trump se ishte i përgjuar në Kullën Trump gjatë fushatës parazgjedhore, transmeton KosovaPress.

Ai pohoi se presidenti amerikan nuk ka në kompetenca të urdhërojë përgjimin e cilido shtetas amerikan.

Ndryshe, Trump në fillim të marsit në Twitter shkroi se ishte përgjuar nga administrata e ish-presidentit Barack Obama, pa dhënë ndonjë fakt lidhur me këtë.

“E tmerrshme. Obama urdhëroi përgjimin e zyrës në Kullën Trump. Asgjë nuk është gjetur”, kishte shkruar Trump në Twitter.