A çoi TikTok në fitoren e kandidatit ultranacionalist në zgjedhjet presidenciale në Rumani?

Partia Kombëtare Liberale (PNL) e qendrës së djathtë të Rumanisë ka paguar për një fushatë në TikTok e cila përfundimisht çoi në fitoren e kandidatit ultranacionalist të ekstremit të djathtë Calin Georgescu në raundin e parë të zgjedhjeve presidenciale më 24 nëntor, sugjeron një raport i publikuar nga Snoop.ro.

Bëhet e ditur se rreth 130 influencues, të zgjedhur nga Kensington Communications – një kompani që kryen fushatën në emër të PNL – morën një skenar dhe i përcollën publikut cilësitë e një presidenti të ardhshëm në një video.

Fushata mblodhi 2.4 milionë shikime.

Raporti citon një burim nga autoriteti tatimor i Rumanisë, i cili kreu hetimin mbi shpenzimet politike, i cili tha: “Është një tronditje për të gjithë që paratë publike të ofruara nga taksapaguesit për PNL-në u përdorën për të promovuar një kandidat tjetër”.

Kensington Communication tha në një deklaratë për shtyp se do të paraqesë një ankesë penale për autoritetet gjyqësore për të hetuar devijimin e mundshëm të fushatës së saj në favor të një kandidati ekstremist, shkruan euronews, përcjell Telegrafi.

Raporti i Snoop.ro sugjeron gjithashtu se fushata TikTok nuk është mjeti i vetëm nga i cili përfitoi Georgescu: eksperti i IT-së Bogdan Peşchir, i njohur si “BogPR”, dhuroi mbi 1 milion euro për përdoruesit e llogarive TikTok që promovuan Georgescu.

Ndryshe, raporti vjen pasi Komisioni Evropian njoftoi se hapi procedurat zyrtare kundër TikTok për shkeljen e supozuar të Aktit të Shërbimeve Dixhitale (DSA) duke mos zbutur në mënyrë adekuate rreziqet që lidhen me integritetin e zgjedhjeve në Rumani.

Raundi i parë i zgjedhjeve presidenciale pa fitoren e papritur të Georgescu, një kandidat euroskeptik miqësor ndaj Kremlinit, i cili më parë ishte pak i njohur për publikun.

Zgjedhjet u anuluan pasi Gjykata Kushtetuese mori prova të ndërhyrjes ruse në procesin e votimit, veçanërisht në TikTok, siç ofrohet nga shërbimet e inteligjencës së vendit.

TikTok tha në një deklaratë se platforma e tij “nuk pranon reklama politike me pagesë” dhe “heq në mënyrë proaktive përmbajtjen për shkeljen e politikave për dezinformimin, ngacmimin dhe gjuhën e urrejtjes”.

“Ne vazhdojmë të punojmë me Komisionin Evropian, si dhe me autoritetet rajonale dhe kombëtare për të adresuar kërkesat dhe për të diskutuar shqetësimet”, tha një zëdhënës i kompanisë. /Telegrafi/