Çka preferohet të hamë për iftar? Flet nutricistja Rexhepi

Pjesa më e rëndësishme e muajit të Ramazanit është agjërimi, që ndihmon për të forcuar disiplinën dhe durimin, si dhe për të rritur ndjenjën e solidaritetit me ata që janë në nevojë.

Gjatë këtij muaji besimtarët myslimanë nuk hanë dhe pinë nga agimi deri në perëndimin e diellit.

E lidhur me rëndësinë e të ushqyerit shëndetshëm gjatë këtij muaji dhe se çfarë duhet të përmbajë shujta e iftarit ka folur nutricistja Urata Rexhepi.

Rexhepi në podcastin “Shëndeti në rend të parë” ka theksuar se kujdes të shtuar duhet t’i kushtohet edhe sasisë së ushqimit në iftar në mënyrë që të mos rëndohet lukthi.

Ajo rekomandoi se iftari duhet të fillojë me një ose dy gota ujë dhe me hurme.

“Mirë është së pari që iftarin me fillu me një, dy gota ujë dhe një ose dy hurme… Hurmat janë të mira me fillu iftarin pasi kanë minerale, makro dhe mikronutrientë…”, tha ajo.

Sipas saj, më pas mund të pauzohet pak dhe të vazhdohet me një pjatë supë të shtëpisë.

“… Pastaj me pushu pak, mund të vazhdohet me një supë të shtëpisë e përgatitur me perime të ndryshëm… dhe pastaj me vazhdu me pjatën kryesore”’, u shpreh ajo.

Rexhepi tha se pjata kryesore mund të hahet edhe më vonë në mënyrë që të mos ngarkohet lukthi shumë.

Podcasti “Shëndeti në rend të parë” mbështetet nga kompania Muqa Solar. /Telegrafi/