Vendet e Bashkimit Evropian duhet të njohin një martesë të të njëjtës gjini të lidhur ligjërisht kudo në bllok, edhe nëse legjislacioni i tyre i brendshëm nuk e parashikon këtë, tha Gjykata Evropiane e Drejtësisë në një vendim të martën.
Refuzimi i njohjes së një martese të ligjshme është "në kundërshtim me ligjin e BE-së sepse shkel atë liri dhe të drejtën për respektimin e jetës private dhe familjare", thanë gjyqtarët, dhe "mund të shkaktojë shqetësime serioze në nivel administrativ, profesional dhe privat, duke i detyruar bashkëshortët të jetojnë si persona të pamartuar", transmeton Telegrafi.
Çështja përfshin dy shtetas polakë që u martuan në Berlin në vitin 2018 dhe më pas u kthyen në Poloni, ku kërkuan që certifikata e tyre e martesës në gjuhën gjermane të transkriptohej në regjistrin civil polak për njohje.
Kërkesa u refuzua sepse Polonia nuk lejon martesën e të njëjtës gjini.
Çifti e kundërshtoi vendimin në Gjykatën Supreme Administrative Polake, e cila e referoi çështjen në GJED në Luksemburg. Të martën, gjyqtarët vendosën se martesa ishte e vlefshme në të gjithë bllokun me 27 anëtarë.
"Bashkëshortët në fjalë, si qytetarë të BE-së, gëzojnë lirinë për të lëvizur dhe banuar brenda territorit të shteteve anëtare dhe të drejtën për të jetuar një jetë normale familjare kur ushtrojnë këtë liri dhe pas kthimit në shtetin e tyre anëtar të origjinës", thanë ata.
"Kur krijojnë një jetë familjare në një shtet anëtar pritës, veçanërisht në bazë të martesës, ata duhet të kenë sigurinë për të qenë në gjendje të ndjekin atë jetë familjare pas kthimit në shtetin e tyre anëtar të origjinës", u tha ndër tjera.
Gjyqtarët vërejnë se vendimi i tyre nuk i detyron shtetet anëtare të ndryshojnë legjislacionin e tyre të brendshëm për të njohur martesën e personave të të njëjtës gjini, por përkundrazi i detyron ata të njohin martesat e lidhura ligjërisht në një vend tjetër të BE-së.
Procedura duhet të zbatohet "pa dallim" ose pengesa shtesë.
Që nga sot, më shumë se gjysma e 27 shteteve anëtare e njohin martesën e personave të të njëjtës gjini. Holanda bëri histori në vitin 2001 duke u bërë kombi i parë në botë që e bëri këtë.
Të tjerë i njohin bashkimet civile të personave të të njëjtës gjini, por Polonia aktualisht nuk e bën, pavarësisht një përpjekjeje nga kryeministri Donald Tusk për të forcuar të drejtat LGBTQ+ në vend. /Telegrafi/
