Trajneri i Chelseat, Enzo Maresca, është nën presion gjithnjë e më të madh pasi drejtuesit e klubit i kanë vendosur si objektiv përfundimin në katër vendet e para të Ligës Premier këtë sezon.
Sipas BBC Sport, klubi do ta rishikojë këtë objektiv në fund të kampionatit, por një start i dobët ka shtuar shqetësimet rreth së ardhmes së italianit.
Chelsea ka grumbulluar vetëm tetë pikë nga gjashtë ndeshjet e para, duke pësuar edhe dy humbje radhazi. Kjo ka bërë që presioni mbi Marescën të rritet ndjeshëm. Analisti i “Match of the Day”, Alan Shearer, theksoi:
“Kur merr drejtimin e Chelseat, e di se je nën presion nëse humb ndeshje. Ky është rregulli i menaxhimit, por edhe më shumë kur je te Chelsea. Ata kanë humbur dy ndeshje dhe Maresca e kupton situatën".
Ndërkohë, edhe tifozët duket se po humbasin besimin te trajneri. Qasja e tij e perceptuar mbrojtëse në duelet ku Chelsea mbeti me dhjetë lojtarë, kundër Manchester United dhe Brighton, ka ngjallur kritika.
Pavarësisht përpjekjeve për të stabilizuar ekipin pas kartonëve të kuq të hershëm, skuadra i humbi të dyja ndeshjet, duke lënë frustrimin të shpërthejë në tribunë.
Mbetet për t’u parë nëse Maresca do ta arrijë objektivin dhe do ta sigurojë një vend në Ligën e Kampionëve në sezonin e tij të dytë me Chelsean. Megjithatë, nisja e dobët në kampionat mund të rezultojë një pengesë serioze për “Blutë” në rrugën drejt top katërshes. /Telegrafi/
