Çfarë mund të ndodhë “një ditë pas përfundimit të luftës Izrael-Hamas”?

“Bibla thotë se ka një kohë për paqe dhe një kohë për luftë”, tha kryeministri i Izraelit, Benjamin Netanyahu më 30 tetor. “Kjo është një kohë për luftë”.

Por çfarë ndodh kur kjo nuk do të jetë më kështu?

Mes vdekjes, shkatërrimit, zhvendosjes dhe dëshpërimit në Gaza, fokusi ka qenë i kuptueshëm në reagimin e Izraelit.

Dhe askush nuk ka folur shumë për atë që vjen më pas.

Të hënën, Netanyahu na dha vlerësimin e tij.

“Unë mendoj se Izraeli, për një periudhë të pacaktuar… do të ketë përgjegjësinë e përgjithshme të sigurisë (për Gazën), tha ai për ABC News, “sepse ne kemi parë se çfarë ndodh kur ne nuk e kemi atë”.

Megjithatë, siç shkojnë planet, kjo ndoshta ishte qëllimisht e paqartë, vlerësohet në një analizë e Elliott Gotkine për CNN, përcjell Telegrafi.

Lexo po ashtu Netanyahu zbulon se cili është plani i Izraelit për Rripin e Gazës - pas përfundimit të luftës kundër Hamasit

“Kjo mund të nënkuptojë vendosjen e forcave tokësore izraelite. Mund të nënkuptojë koordinim me një lloj force paqeruajtëse. Në teori mund të nënkuptojë riokupimin e Gazës siç bëri Izraeli nga viti 1967 deri në 2005, megjithëse pavarësisht se kjo favorizohet nga disa ministra të krahut të djathtë, duket e pamundur”, mendon ai.

Andaj, vlerëson shkrimi, zgjidhja më e përshtatshme për Izraelin, dhe ajo që Sekretari Amerikan i Shtetit, Antony Blinken duket se favorizon, do të ishte rivendosja e kontrollit të Autoritetit Palestinez (PA) në rrip – diçka që u hoq dhunshëm nga Hamasi në vitin 2007.

Por kjo ndoshta nuk do të ndodhë në afat të shkurtër.

Presidentit të AP, Mahmoud Abbas, tashmë në vitin e 19-të të mandatit katërvjeçar, tashmë i mungon legjitimiteti mes palestinezëve në Bregun Perëndimor të pushtuar nga Izraeli.

Të gjitha më sipër, natyrisht, bazohen në dy supozime.

Së pari, që Izraeli përmbush objektivin e tij për të shkatërruar Hamasin ushtarakisht dhe për ta hequr atë nga pushteti.

Lexo po ashtu Të dhëna që thuhet se tregojnë se sa e rëndë është "shkalla e shkatërrimit në Gaza"

Dhe së dyti, që Netanyahu të mbetet në krye pasi të përfundojë lufta – dhe kjo nuk ka gjasa, vlerësohet në pjesën e fundit të analizës së CNN.

Kjo pasi që, “shumica e izraelitëve duan ta shohin atë të largohet”.

“Për më tepër, befasia do të ishte nëse Netanyahu kapet pas pushtetit, jo nëse e humb atë. Që do të thotë se vendimi se çfarë të bëhet me Gazën një ditë më pas, ka shumë të ngjarë të bjerë në duart e dikujt tjetër”. /Telegrafi/