Nëse e keni të vështirë të flini, mund të keni dëgjuar për një trend të ri në rrjete sociale që quhet “dush në errësirë”. Kjo do të thotë të bëni dush me dritat e fikura ose të zbehura, zakonisht para gjumit, si pjesë e rutinës për t’u qetësuar.
Shumë persona thonë se dushi në errësirë ndihmon në qetësimin e mendjes, uljen e stresit dhe përmirësimin e cilësisë së gjumit. Ndryshe nga dushi i mëngjesit që të zgjon dhe të jep energji, ky lloj dushi synon të ulë ekspozimin ndaj dritës, të rregullojë temperaturën e trupit dhe të përgatisë organizmin për gjumë.
A ndihmon vërtet për gjumin?
Sipas neuroshkencëtares Chelsie Rohrscheib, një dush i ngrohtë para gjumit ndihmon sepse:
Trupi ka nevojë për një ulje të lehtë të temperaturës për të fjetur;
Dushi i ngrohtë e rrit përkohësisht temperaturën, por pasi dilni prej tij, temperatura bie shpejt;
Kjo imiton procesin natyral që ndodh para gjumit dhe e ndihmon trurin të kalojë më lehtë në gjumë.
Gjithashtu, errësira ndihmon në prodhimin e melatoninës, hormonit që rregullon ciklin gjumë–zgjim. Drita e fortë e ul prodhimin e melatoninës, ndërsa errësira e rrit atë, duke i dhënë trupit sinjal se është koha për të fjetur.
A ka përfitime për shëndetin mendor?
Po. Ekspertët thonë se dushi në errësirë, ndihmon në relaksim dhe ul stresin, ul nivelin e kortizolit (hormoni i stresit) dhe mund të shndërrohet në një moment ndërgjegjësimi (mindfulness).
Në errësirë përqendroheni më shumë tek ndjesitë — uji i ngrohtë, aroma e produkteve, zhurma e ujit — gjë që mund të ndihet si një formë meditimi. Kjo ndihmon të lini pas shqetësimet e ditës dhe të përgatiteni për gjumë.
Nuk është zgjidhje magjike
Ekspertët paralajmërojnë se dushi në errësirë nuk është kurë për problemet serioze të gjumit. Personat me pagjumësi kronike ose çrregullime të gjumit mund të kenë nevojë për ndihmë mjekësore.
Gjithashtu, nëse e shihni si detyrim apo si diçka që “duhet patjetër ta bëni”, mund të ketë efekt të kundërt dhe të shtojë stresin.
Çfarë funksionon vërtet për gjumë më të mirë?
Përveç dushit në errësirë, ekspertët rekomandojnë:
Mbani orar të rregullt gjumi (flini dhe zgjohuni në të njëjtën orë çdo ditë).
Shmangni kafeinën të paktën 6 orë para gjumit.
Mos hani vakte të rënda rreth 3 orë para gjumit.
Shmangni dritat e forta dhe ekranet para gjumit.
Mbajeni dhomën e gjumit të errët, të freskët dhe të qetë.
Nëse nuk ju zë gjumi brenda 20 minutash, ngrihuni dhe bëni diçka qetësuese për pak minuta, pastaj provoni sërish.
