Lajme Shqipëri

Burokracia, vonesat dhe standardet e dyfishta pengojnë qytetaren nga Kosova të marrë shtetësinë shqiptare

Para 1 muaji

Fiks Fare denoncoi mbrëmjen e së hënës burokracitë dhe sorollatjet e institucioneve shqiptare për dhënien e shtetësisë për shqiptarët e Kosovës.

Një e re nga Kosova, e cila ka ardhur në Shqipëri prej me shume vitesh, ka kryer shkollën e lartë 5 vite, ka filluar pune prej 9 vitesh me kontratë të rregullt, është martuar me një shtetas shqiptar dhe ka një fëmijë 3 vjeç.

Por, prej disa vitesh është endur në dyert e policisë, ministrisë së brendshme dhe presidencës për të marrë pasaportën. Gjatë kësaj kohe i kanë kthyer disa herë dokumentet; njëherë punonjësit humbën 1 vërtetim, herën e dytë nga zvarritja skaduan dokumentet, një herë se kërkonin provim të gjuhës shqipe dhe në fund kontrata e qirasë, e bërë para noterit dhe i noterizuar nga nje tjeter doli sipas ministrisë e parregullt.

Kontrata e qeras ndërkohë është pranuar në raste të mëparshme nga të gjitha institucionet përfshir këtu policinë ministrinë dhe presidencën dhe është rinovuar tre herë në 5 vite.

Në redaksinë e emisionit Fiks Fare u ankua z. Klaudjo Jonuzaj, i cili thotë se është martuar me një shqiptare nga Kosova, e cila prej shumë vitesh kërkon pasaportën shqiptare. “Sihana jeton që prej vitit 2010 në territorin e Republikës së Shqipërisë, ku fillimisht ka bërë studimet 5 vjeçare dhe nga viti 2015 është në punë, me kontratë të rregullt. Madje ka marrë edhe leje qëndrimi. Prej disa vitesh, ne jemi martuar, ku kemi bërë celebrimin dhe të gjitha dokumentet. Pas martese, ne kemi edhe një fëmijë”, pohon Klaudjo.

Por, pavarësisht se punon në mënyrë të rregullt, është martuar me një shtetas shqiptar dhe ka një fëmijë po me këtë shtetas, Sihana është sorollatur prej shumë vitesh që të marrë shtetësinë, pasaportën shqiptare. “Sa herë që aplikojmë na nxjerrin mungesë dokumentesh. Njëherë mungon një letër nga emigracioni. E çojmë letrën dhe na kthejnë përgjigje që letra nuk gjendet dhe se e kanë humbur. Pasi e nxjerrim vërtetimin e migracionit dhe e dorëzojmë për herë të dytë, dosja na kthehet prap sepse kishte kaluar afati i të gjitha dokumentave. Certifikata të bashkëshorteve, shqiptare dhe kosovare, gjendja gjyqësore, vërtetimet e lejeve të qëndrimit, kontratë qiraje. Këto kanë afat 6 muaj përdorim” vijon Klaudjo.

Ai shton se, deri tani kanë plotësuar plot 4 herë letrat. “Herën e fundit për kontratën e qirasë, pasi e kemi bërë kontratën te noteri me 1 pronar, kur certifikata e pronësisë ka 3 bashkëpronarë. Ne këtë kontratë e kemi çuar disa herë te policia, Ministria e Brendshme dhe Presidenca. Asnjëherë s’na e kanë kthyer. Me këtë kontratë kemi të gjitha dokumentet, gjendjen civile, lejet e qëndrimit, regjistrimin e fëmijës në kopsht. E kanë pranuar të gjithë”, thotë ai.

Më tej shton se, në aplikimin e parë ka qenë kriter edhe një provim i gjuhës dhe historisë së Shqipërisë, edhe për shqiptarët e Kosovës. “Pyesnim ku ta bënim këtë provim, asnjë s’na jepte përgjigje”, pohon Klaudjo, teksa shton se deri më tani vetëm burokraci.

Pas ankesës, i riu shkon te Komisariati i Policisë Nr.2 në Tiranë dhe pyet punonjësen që merret me shtetësinë. Ajo i thotë se kështu janë procedurat dhe ata i kanë bërë po i ka kthyer Ministria e Brendshme dhe Drejtoria e Policisë. “Sajojnë lloj-lloj dokumentesh. Tani i kthejnë për gjënë më të vogël”, i thotë ajo, teksa i kërkon që tashmë dokumentet t’i plotësojë nga e para se për pak javë skadojnë. Klaudjo shkon edhe në Drejtorinë e Policisë së Tiranës, duke kërkuar oficerin Yzeir Zeqiri, por ai i thotë se “dosja është te Komisariati nr.2, plotësoje”.

Gazetarët e Fiks Fare kontaktojnë oficerin e policisë Yzeir Zeqiri, i cili punon në Drejtorinë e Policisë së Tiranës dhe merret me shtetësisë. Ai pranon se dokumentet i janë kthyer disa herë, teksa shton se tani ka probleme kontrata e qirasë. Fiksi i bën me dije se Klaudjo dhe Sihana kanë aplikuar gjithmonë me këtë kontratë, ndërsa ai thotë se tani duhet të bëjë tjetër dhe t’a sjellë. E pyesim se nëse e sjell të renë, skadojnë dokumentet e vjetra. Na thotë se do t’i shohë dhe t’na kthejë përgjigje.

Oficeri telefonon sërish gazetarët disa minuta më pas dhe thotë se “vetëm të sjellë kontratën e qirasë, pasi dokumentet e tjera kanë datë mesin e dhjetorit”. Por, sa të kalojnë nga Komisariati Nr,2, te Drejtoria e Policisë në Ministrinë e Brendshme dhe më pas në Presidencë, dokumentet do të skadojnë sërish.

Ky problem prej vitesh pret zgjidhje nga institucionet shqiptare të cilat nuk kanë një praktikë të saktë të dokumenteve që kërkojnë, përdorin standarde të dyfishta në bazë të mendimit të secilit punonjës që merret me procedurën dhe vonojnë pa mbajtur përgjegjësi aplikimet duke orvatur aplikantët për vite të tëra.

Denoncuesit kërkojnë vetëm që çështje të merret me seriozitet dhe procedura të ndiqet me një standard, korrektësi dhe shpejtësi. /Telegrafi/