Brenda vitit drejtoria e urbanizmit në Ferizaj shqyrton mbi dy mijë lëndë të ndryshme

Drejtoria e Urbanizmit në Komunën e Ferizajt gjatë këtij viti është përballur me një varg sfidash por edhe të arritura. Kjo drejtori që drejtohet nga Arbër Bytyqi, ka shqyrtuar mbi dy mijë lëndë e kërkesa të ndryshme të qytetarëve. E gjithë këto janë shqyrtuar nga një staf mjaftë i vogël. Në mesin e këtyre lëndëve kishte leje të ndryshme ndërtimore, kërkesa për projekte të ndryshme në fushën e ambientit, vendime për procedura të hartimit të dokumenteve strategjike e të tjera.

Arbër Bytyqi, drejtor i kësaj drejtorie, në një intervistë për Telegrafin ka thënë se janë përballur me sfida të vazhdueshme sa i përket dhënies së lejeve ndërtimore pasi që komuna ka pasur telashe me Planin Zhvillimor Komunal.

“Sfida kryesore e drejtorisë së urganizimit në Ferizajt ka qenë mos aprovimi i dokumenteve të planifikimit dhe pezullimi i hartës zonale nga Ministria e Ambientit dhe Planifikimit Hapësinor, ku në fund të vitit të kaluar vetëm se është dërguar shkresa për pezullim, për shkak që plani zhvillimor komunal është në gjykatë. Kjo normalisht që na ka shkaktuar telashe të mëdha në vazhdimin e procedurave që i kemi pasur, sidomos për lejet ndërtimore të cilat kanë qenë kërkesa të qytetarëve. Prandaj ka qenë e vështirë të gjenden bazat ligjore për vazhdimin tutje për lëshimin e lejeve ndërtimore”, ka thënë Bytyqi.

Sipas tij, sa i përket këtij viti, drejtoria e Urbanizmit është përballur me qindra e mijëra kërkesa e lëndë të ndryshme.

“Sa i përket vitit 2024 në drejtorinë tonë mbi dy mijë kërkesa kanë ardhur për trajtim të cilat janë shqyrtuar. Në aspektin e stafit ne kemi mungesë sepse i kem vetëm katër arkitekt dhe me këta punonjës trajtohen të gjitha lëndët dhe kërkesat që vijnë në drejtorinë tonë. Pra, kjo është një sfidë në veti. Po besoj se përkundër problemeve dhe vështirësive ne ia kemi dalë dhe i kemi trajtuar të gjitha lëndët  dhe kërkesat e qytetarëve”, ka thënë Bytyqi.

Sipas Bytyqit në këtë drejtori përveç kërkesave të qytetarëve ata kanë realizuar edhe dhjetëra projekte në fushën e mjedisit.

“Ne kemi realizuar një numër të madh të projekteve sa i përket mjedisit, duke filluar me projektin e parkut “Liria” dhe me projektin te “Kodra e Sherretëve”. Pastaj pas zhvendosjes së objektit të kompanisë “Pastërtia” ne kemi filluar t’i rrënojmë objektet e vjetra dhe do të fillojmë me punime të reja për ndërtimin e një parku të ri. Viti 2024 kemi qenë të fokusuar edhe në këtë fushë”, ka thënë ai më tej Bytyqi.

Drejtori Bytyqi, ka shtuar se tashmë kanë marrë vendim për hartimin e Planit Zhvillimor Komunal dhe Hartës Zonale, pasi që në fund të vitit 2025 PZHK-së i skadon afati.

“Pas miratimit në Kuvendin Komunal ne kemi nisur procedurat për hartimin e PZHK-së dhe të Hartës Zonale të re. Po besojmë që procedurat e prokurimit për angazhimin e stafit profesional për hartimin e këtyre dokumenteve do të vazhdojnë në rregull dhe në fillim të vitit të ardhshëm të fillojmë me procedura teknike për hartimin e planit të ri të PZHK-së 2025-2033 i cili është një prej dokumenteve strategjike për zhvillimin e komunës së Ferizajt”, ka shtuar ai. /Telegrafi/