Borissov: Anëtarësimi i Maqedonisë së Veriut dhe Shqipërisë në BE është qëllim strategjik i Bullgarisë

Qëllimi strategjik i Bullgarisë është anëtarësimi i Maqedonisë së Veriut dhe Shqipërisë në Bashkimin Evropian, tha ish-Kryeministri bullgar Boyko Borissov në një takim me përfaqësuesit e rinisë së partisë së tij.

Siç raporton AIM nga Sofja, duke informuar se ai kishte biseduar me kryeministrin e RMV-së Zoran Zaev, Borissov theksoi se Marrëveshja për Fqinjësinë e Mirë e vitit 2017 është baza e marrëdhënieve të Bullgarisë me Republikën e Maqedonisë së Veriut.

Në takimin me të rinjtë e partisë, Borissov tha se mënyra se si qeveria teknike e Bullgarisë dhe Presidenti bullgar Rumen Radev tani po negociojnë me Maqedoninë e Veriut mund të çojë në një rezultat të keq për Sofjen ose “do të bëjë që dy vendet më të afërta dhe popujt e tyre të urrejnë njëri-tjetrin në dekadat e ardhshme”.

Ai u bëri thirrje të rinjve të bëjnë gjithçka që të jetë e mundur në mënyrë që brezat e tanishëm dhe të ardhshëm të mos e urrejnë njëri-tjetrin, duke akuzuar Radev për ndarjen e Bullgarisë, duke shkaktuar ndarje në shoqëri për çështjen e Maqedonisë së Veriut./Telegrafi/