Një adoleshent është arrestuar pas të shtënave me armë në një qendër tregtare në kryeqytetin norvegjez të Oslos.
Sipas mediave të huaja, përcjell Telegrafi, 19-vjeçari telefonoi policinë për të thënë se kishte një armë dhe se ndodhej brenda kompleksit Storo Storsenter pak para se të hapte zjarr, thanë detektivët për mediat lokale.
Blerësit e panikuar ikën nga vendi i ngjarjes ndërsa policia rrethoi qendrën dhe ndihmoi stafin të evakuohej.
I dyshuari u arrestua pak më vonë, ndërsa oficerët kontrolluan ndërtesën për viktima të mundshme.
Rreth gjysmë ore pas incidentit, policia tha se kishte kontrolluar "pothuajse të gjithë qendrën" dhe nuk gjeti persona të plagosur.
Një zëdhënës i policisë së Oslos u tha mediave lokale se një e shtënë e vetme u qëllua në një zonë të përbashkët brenda qendrës dhe goditi tavanin.
Një pushkë gjahu dhe një qese me municione u gjetën pranë të dyshuarit, si dhe një qese që përmbante një thikë dhe një shkop bejsbolli.
Qendra tregtare është rihapur që atëherë pasi vendi i ngjarjes u shpall i sigurt.
Një prani e madhe policie, përfshirë makina policie dhe një helikopter, mbeti në vendngjarje më vonë gjatë mëngjesit. /Telegrafi/
